काठमाडौं । गर्मी बढेसँगै बालबालिकामा मौसमी रोगको संक्रमण देखिन थालेको छ । काठमाडौंको कान्तिबाल अस्पतालमा मौसमी समस्या लिएर उपचारमा आउने बिरामीको संख्या बढेको छ ।
अस्पतालकाअनुसार अहिले वहिरंग र आकस्मिक सेवाका लागि दैनिक एक हजार बिरामी आउने गरेका छन् । जबकी असारसम्म यो संख्या दैनिक ७ सयको हाराहारीमा हुने गरेको थियो । अहिले मौसमी समस्याका कारण विशेषगरी ज्वरोको बिरामी बढी आउने गरेका हुन् ।
कुल बिरामीमध्ये ८० प्रतिशत ज्वरोको समस्या लिएर आउने गरेको अस्पतालले जनाएको छ । कतिपय बिरामी निमोनिया, टाइफाइड, झाडापखालाका छन् । त्यसबाहेक दम र रूघाखोकीका बिरामी पनि बढेका छन् । टाइफाइड र निमोनिया भएकाहरूलाई भर्ना नै गर्नुपरेको अस्पतालले जनाएको छ ।
अस्पतालले अहिलेको मौसममा बालबालिकालाई धेरै चिसो पदार्थ नदिन, घरबाहिर निस्कनु परे मास्क लगाइ सतर्कता अपाउनसमेत सुझाव दिएको छ ।
