पाल्पा । डेंगी संक्रमितको संख्या लुम्बिनी प्रदेशमै पाल्पामा सबैभन्दा धेरै देखिएको छ ।
प्रदेशका १२ जिल्लामध्ये पाल्पामा पछिल्लो ६ महिनामा १ सय २० जनामा डेंगी संक्रमण देखिएको हो । पाल्पाका युनाइटेड मिसन अस्पताल, पाल्पा अस्तपाल, लुम्बिनी मेडिकल कलेज लगायतमा आएका बिरामीमा डेंगी संक्रमण देखिएको कार्यालयले जनाएको छ ।
पछिल्लो पुस महिनाको दोस्रोसाता यता लुम्बिनी प्रदेशमै डेंगी संक्रमण वृद्धि भएको स्वास्थ्य कार्यालयका ल्याब टेक्निसियन अधिकृत तथा सूचना अधिकारी मधुसुधन भट्टराईले जानकारी दिनुभयाे ।
लुम्बिनी प्रदेशका तराईका रूपन्देहीमा ७०, बाँकेमा २७, दाङमा ५८, बर्दियामा ११ जना र कपिलवस्तुमा ८ जनामा डेगी संक्रमण देखिएको छ । गुल्मीमा ३२, पश्चिम नवलपरासीमा ८, अर्घाखांचीमा १६, रोल्पा र प्यूठानमा ७-७, रूकुम पश्चिममा ३ जनामा देखिएको निर्देशनालयले जनाएको छ ।
लुम्बिनी प्रदेश सरकार, स्थानीय तहले डेंगी नियन्त्रणमा वर्षेनि लाखौ खर्च गरे पनि संक्रमणमा भने कमी आउन सकेको छैन ।
