काठमाडौं । काठमाण्डौ उपत्यकामा बढीरहेको प्रदूषण अझै केही समय कायमै रहने भएको छ ।
मौसम पूर्वानुमान महाशाखाका अनुसार अझै केही दिन पानी पर्ने र बेगका साथ ठूलो हावा लाग्ने सम्भावना छैन । शुक्रबारदेखि आकाश केही खुल्ने भए पनि पूर्णरुपमा भने सफा नहुने महाशाखाको भनाइ छ ।
बिहीबार काठमाडौं उपत्यकाको वायुको गुणस्तर अर्थात् एक्यूआई साढे २ सयभन्दा माथी रह्यो । यो भनेको स्वास्थ्यका लागि निकै अस्वस्थ अवस्था हो । बिहीबार मात्र हैन केही दिनयता वायुको गुणस्तरका आधारमा काठमाडौं विश्वकै प्रदूषित सहरको पहिलो स्थानमा रहँदै आएको छ । प्रदूषणका कारण हुने स्वास्थ्य समस्या लिएर मानिसहरू अस्पताल पुग्न थालेका छन् ।
काठमाडौं उपत्यकाका अस्पतालमा स्वासप्रस्वास, रुघाखोकी, दम, निमोनिया, छालाको समस्या, छाति दुख्ने, आँखा पोल्नेलगायतका समस्या लिएर पुग्नेहरु बढेका छन् । अस्पतालहरूका अनुसार अहिले वायू प्रदूषणका कारण दीर्घ रोगी मात्र नभएर अन्यमा पनि स्वास्थ्य समस्या देखिइरेको छ । टेकु अस्पतालले यस्ता समस्या लिएर आउने बिरामीको संख्या १० प्रतिशतले बढेको जनाएको छ । यसैगरी त्रिवि शिक्षण अस्पतालमा १५ प्रतिशत र वीर अस्पतालाको छाती रोग विभागमा ४० प्रतिशतसम्मले बिरामी बढेका छन् । वीर अस्पतालको छाती विभागअन्तर्गतका सबै शैया भरिएका छन् । आकस्मिक कक्षमा रहेका बिरामीले शैयाका लागि ४८ घण्टासम्म पालो कुर्नुपरेको छ ।
‘हाम्रो अस्पताल हामीले हेर्यौ भने जहिले पनि हाम्रो अस्पतालको बेडको क्षमता भन्दा बढी बिरामी आउनु हुन्छ । अलिक सिकिस्त बिरामीहरू इमरजेन्सीमा वेट गर्नु हुन्छ । वेड खाली भएको केसमा उहाँहरू वार्डमा सिफ्ट हुनुहुन्छ । अब जेनेरल टेन्डेन्सी हेर्यौ भने पछिल्लो महिना इमरजेन्सीमा हाम्रो व्याकलक हुन्थेन, सामान्यतया छातिका बिरामीहरू भर्ना हुने बिरामीहरू इमरजेन्सीमा आइसकेपछि छाती विभागको बेडमा तुरुन्त भर्ना पाइहाल्नुहुन्थ्यो भने पछिल्लो २–३ हप्तामा त्यसको वेटिङ टाइम २४ देखी ४८ घण्टा बेडको लागी पनि पर्खनुपर्ने देखिएको छ,’ वीर अस्पतालका छाती रोग विशेषज्ञ डा. अशेष ढुंगानाले भन्नुभयो ।
प्रदूषण बढिरहेका बेला घर बाहिर हिडडुल गर्दा मास्क लगाउनु बाहेक अरु कुनै विकल्प छैन । यस्तो बेला सावधानी अपनाएर सकेसम्म घरभित्रै बस्न र वायु प्रदूषण बढाउने गतिविधि नगर्न चिकित्सकहरूको सुझाव छ ।
