काठमाडौं । संघीय राजधानी काठमाडौं लगातार दुई दिनदेखि विश्वकै सबैभन्दा प्रदूषित शहर बन्यो । सोमबार र मंगलबार विश्वकै प्रदूशित सहरको सूचीको एक नम्बरमा रहेको काठमाडौँ आज दोस्रो नम्बरमा छ ।
वायुको गुणस्तर निकै कमजोर हुँदा मानव स्वास्थ्यका लागि हानिकारक देखिएको छ । अहिले काठमाडौंको वायुको गुणस्तर निकै अस्वस्थकर देखिएको छ ।
स्विजरल्यान्डस्थित आईक्यू एयरका अनुसार मंगलबार काठमाडौं विश्वकै प्रदूषित सहर बनेको हो । सोमबार पनि काठमाडौँ प्रदूषित शहरको सूचीमा एक नम्बरमै थियो । सामान्यतया वायु गुणस्तर सूचकांक शून्यदेखि ५० हुँदा राम्रो, ५१ देखि १०० हुँदा मध्यम, १०१ देखि १५० हुँदा संवेदनशील समूहका लागि अस्वस्थकर मानिन्छ ।
यस्तै, १५१ देखि २०० हुँदा अस्वस्थ र २०१ देखि ३०० हुँदा निकै अस्वस्थ मानिन्छ । यो भनेको हानिकारक हो । काठमाडौंको वायू गुणस्तर केही दिन यता यहि वर्गमा पर्दै आएको छ ।
त्यसो त हरेक वर्ष माघदेखि वैशाखसम्म काठमाडौंको वायु निकै अस्वस्थ हुने गरेको छ । सवारी साधन र उद्योगबाट निस्कने धुँवा, सडकको धूलो, फोहोर बाल्दा निस्कने धुँवालगायतका कारणले वायु प्रदूषण हुने गरेको हो ।
त्यति मात्र नभएर यो बेला धेरै ठाउँमा डढेलो लाग्ने, इँटा भट्टा धेरै सञ्चालनमा आउने र सुख्खा हुने भएकाले पनि धूलो र धुवाँले प्रदूषण बढ्ने गरेको हो । बाहिरबाट आउने धुलो र धुँवाले पनि प्रदूषणलाई बढावा दिने गरेको हो ।
यो साता अस्पतालहरुमा श्वासप्रश्वासको समस्या लिएर अस्पताल पुग्नेहरुको संख्यामा उल्लेखनीय वृद्धि भएको चिकित्सकहरु बताउँछन् । यसबाहेक वायु प्रदूषणले छालासम्बन्धी समस्या, पाचन प्रणालीमै समस्या हुनेलगायतका विभिन्न स्वास्थ्य समस्या देखिने गरेका छन् ।
यो बेला सावधानी अपनाएर बिहान-बेलुकी बाहिर नहिँड्न र हिँड्नै परे मास्कको प्रयोग गर्न उनीहरूको सुझाव छ ।
