काठमाडौं । आगामी आर्थिक वर्षका लागि स्वास्थ्य क्षेत्रको बजेट २० प्रतिशतले घटेसँगै चालु योजनाहरु नै प्रभावित हुने भएका छन् ।
चालु आर्थिक वर्षका लागि स्वास्थ्यमा एक खर्ब ३ अर्ब १८ करोड बजेट रहेकामा आगामी वर्षका लागि ८३ अर्ब ९९ करोड मात्र छुट्याइएको छ । बजेट कम विनियोजन हुँदा ३२२ स्थानमा निर्माणाधीन ५ देखि १५ शय्याका अस्पतालको काम सक्न कठिन हुने स्वास्थ्य मन्त्रालयले जनाएको छ । कुल बजेटको १० प्रतिशत स्वास्थ्यमा नछुट्याउँदासम्म नागरिकको स्वास्थ्यको दायित्व सरकारले लिन नसक्ने र नागरिकले आफ्नै खल्तीबाट उपचार गर्नुपर्ने अवस्था रहिरहने मन्त्रालयको भनाइ छ ।
त्यसो त स्वास्थ्य मन्त्रालयले कुल बजेटको १० प्रतिशत छुट्याउनुपर्ने भने पनि चालु वर्षका लागि विनियोजित बजेटसमेत खर्च हुन सकेको छैन । आर्थिक वर्ष सकिन करिब डेढ महिना मात्र बाँकी रहँदा अहिलेसम्म करिब ६० प्रतिशत मात्र खर्च भएको छ । असारसम्म ८० प्रतिशत पुँजीगत रकम खर्च हुने आकलन मन्त्रालयको छ । मन्त्रालयले समयमै योजना बनाउन नसक्दा बजेट खर्चमा समस्या देखिएको हो ।
आगामी वर्षका लागि सरकारले स्वास्थ्य क्षेत्रमा नयाँ कार्यक्रम ल्याएको छैन । अधिकांश पुरानै योजना समावेश गरेर बजेट विनियोजन भएकाले स्वास्थ्य क्षेत्र सुधार गर्न नसकिने विज्ञको बुझाइ छ ।
