काठमाडौं । मंसिर १६ गते हुने स्थानीय तह उपनिर्वाचनका लागि आज उम्मेद्वारको अन्तिम नामावली प्रकाशन हुने भएको छ । निर्वाचन आयोगले उम्मेद्वारलाई चुनाव चिन्ह पनि आजै प्रदान गर्ने छ ।
अन्तिम नामावली प्रकाशन गर्नु अघि आजै उम्मेदवारलाई नाम फिर्ता लिन समय दिइएको छ । आज बिहान ९ देखि दिउँसो १ बजेसम्म उम्मेदवारले नाम फिर्ता लिन सक्ने निर्वाचन आयोगले जानकारी दिएको छ ।
कार्यतालिका अनुसार आजै दिउँसो १ देखि ३ बजेसम्म उम्मेद्वारको अन्तिम नामावली प्रकाशन हुनेछ । दिउँसो ३ देखि ५ बजेसम्म उम्मेदवारलाई निर्वाचन चिह्न प्रदान गरिनेछ ।
मङ्सिर १६ गते बिहान ७ देखि अपराह्न ५ बजेसम्म मतदान हुनेछ । कुल ४४ पदमा हुन लागेको निर्वाचनमा ४१० जनाको उम्मेदवारी परेको छ ।
