काठमाडौं । पेशागत हकहितको सुनिश्चिततासहित विद्यालय शिक्षा ऐन जारी गर्न माग गर्दै आन्दोलनरत सामुदायिक विद्यालयका शिक्षकहरू तीन दिनदेखि काठमाडौंमा प्रदर्शनमा छन् ।
उनीहरूले कार्यवाहक प्रधानमन्त्री प्रकाशमान सिंहले बोलाएको वार्तासमेत अस्वीकार गरेका छन् । वार्ताको नाममा आफूहरूलाई अल्मल्याउन खोजिएको भन्दै उनीहरूले आन्दोलनलाई नै निरन्तरता दिने उद्घोष गरेका छन् ।
आन्दोलनरत शिक्षकका मागप्रति सरकार गम्भीर रहेको भन्दै शिक्षामन्त्रीमार्फत् कार्यवाहक प्रधानमन्त्री प्रकाशमान सिंहले शुक्रबार दिउँसो ३ बजे वार्ताका लागि आह्वान गर्नुभयो । तर शिक्षकहरूले वार्तामा सहभागी नभई दिनभर बानेश्वर केन्द्रित सडक प्रदर्शन गरे ।
सरकारले गरेको वार्ता आह्वानलाई बेवास्ता गर्दै शिक्षकहरूले दिनभर सडकमा प्रदर्शनसहित नाचगान गरे । सडकमै गीत, गजल, कविता वाचन तथा देउडा, भजन, खजुरी जस्ता नाचगान गरेर सरकार र राजनीतिक दलहरुलाई उनीहरूले दबाब दिए ।
यसअघि बिहीबार शिक्षा मन्त्रालयले बोलाएको वार्तामा पनि शिक्षकहरु गएका थिएनन् । शिक्षकहरूले अध्यादेशबाट भएपनि कानुन बनाउन माग गरेका छन् ।
सामुदायिक विद्यालयका शिक्षक-कर्मचारीको पेशागत माग सुनिश्चितता हुने गरि विद्यालय शिक्षा ऐन जारी गर्न सरकारलाई बाध्य पार्ने रणनीति शिक्षकहरुको छ ।
विद्यालय शिक्षा विधेयक अहिले संसद्को शिक्षा समितिमा विचाराधीन छ । हिउँदे अधिवेशन भर्खरै सकिएकाले तत्काल संसद्बाट विधेयक पारित हुने अवस्था छैन । संसदीय प्रक्रियामा रहेको विधेयक फिर्ता नगरी अध्यादेश ल्याउने अवस्था पनि छैन ।
तर शिक्षकहरूले अडान कायमै राखेर आन्दोलनमा रहँदा सरकारलाई अप्ठ्यारो परेको छ ।
