काठमाडौं । नेपाल सुपर लिग-एनएसएलमा आज दुई खेल हुँदैछन्। सुपर लिगको आजको पहिलो खेलमा साढे २ बजे पोखरा थन्डर्सले काठमाडौं रेजर्सको सामना गर्नेछ। जारी लिगमा काठमाडौं र पोखरा दुवैले आफ्नो खेल खेल्न लागेका हुन् ।
पोखराले यसअघिका दुवै खेलमा हार ब्यहोरेका छ। उसँगै जो आइडू, आयुष घलान, नवयुग श्रेष्ठ र समिर तामाङजस्ता उत्कृष्ट खेलाडी रहेका छन्। तर यी खेलाडीको उपस्थितिले खेल राम्रो देखिएको भएपनि पोखराले जीत निकाल्न सकेको छैन्।
पोखराको यसअघिका दुवै खेलमा विवाद भएका थिए । विवादले टिमका खेलाडीको मनोबल कमजोर भएको प्रशिक्षकले बताउँदै आएका छन्। यस्तै, काठमाडौंले भने यसअघिका दुई खेलमा दुई अंक जोडेको छ।
उसले ललितपुरसँग २-२ र बुटबल लुम्बिनी एफसीसँग गोलरहित बराबरी खेलेको थियो। अन्य टिमको तुलनामा पर्याप्त आराम समय पाएको काठमाडौंको टिममा युरापको भिन्सेन्ट कजियलो, जिलेस्पीजंग कार्कीजस्ता उत्कृष्ट खेलाडीका कारण टिम बलियो देखिन्छ।
यता, आजै साँझ ६ बजे हुने खेलमा ललितपुर सिटीले धनगढी एफसीको सामना गर्नेछ। यी दुवै टिमका खेलाडीमा जितको मेन्टालिटी देखिन्छ। दुई खेलबाट चार अंक बनाएको ललितपुर दोस्रो र पहिलो खेल नै जितेको धनगढी तेस्रो स्थानमा छ।
यी दुवै टोलीको लक्ष्य आज जित निकालेर शीर्षस्थानमा पुग्ने हुनेछ। ललितपुरसँग आदित्य शाक्य, अनन्त तामाङ, जोफ्रे बाल्टुसले सबै क्षेत्रमा राम्रो नेतृत्व गरिरहेका छन् । उसँग इमोह इजिकेल, पाप इबोउ केबे, जोनाथन कान्टियानाजस्ता व्यक्तिगत ट्यालेन्टको साथ छ।
पछिल्लो दुई सिजना गोलले तहल्का मच्चाएका आफिज ओलावाले र अहमद हिजाजीलाई निरन्तरता दिएको धनगढीमा कृतिश छुन्जु, अमृत श्रेष्ठ र देवेन्द्र तामाङ लगायत राम्रो घरेलु खेलाडी छन्।
ब्राजिलका बारबोजाले टिमलाई जुनसुकै स्थितिबाट पनि कमब्याक गराउने सक्ने क्षमता राख्ने भएको कारण यो खेल निकै रोमाञ्चक हुने अनुमान गर्न सकिन्छ।
