काठमाडौं । काठमाडौं नजिकको पर्यटकीय गन्तव्य चन्द्रागिरीबाट चित्लाङ्गसम्म व्यावसायिक प्याराग्लाइडिङ सुरू भएको छ ।
चन्द्रागिरी एभिएसन प्रालिले शुक्रबारदेखि प्याराग्लाइडिङ सुरू गरेको हो । यसअघि पनि विभिन्न कम्पनीले पटक-पटक परीक्षण उडान गरेपनि व्यवसायीक उडान हुन सकेको थिएन ।
साहसिक पर्यटकका एक दर्जनभन्दा बढी विधा रहेको नेपालमा प्याराग्लाइडिङलाई धेरैले रूचाउने गरेका छन् । शुक्रबार औपचारिक उद्घाटन गरिएपनि व्यावसायीक उडान गर्न भने एक साता लाग्ने कम्पनीले जनाएको छ ।
व्यावसायिक प्याराग्लाइडिङ सुरू भएपछि चन्द्रागिरीबाट उडेर चित्लाङसम्म पुग्न सकिने छ । चित्लाङ अर्को पर्यटकीय गन्तव्य भएकाले यहाँको विकासमा थप सहयोग पुग्नेछ । प्याराग्लाइडिङको उद्घाटन कार्यक्रममा सहभागी नेकपा (एमाले)का प्रमुख सचेतक महेश बर्तौलाले पर्यटन प्रवर्द्धन गर्न निजी क्षेत्रले गरेको लगानी खेर जान दिन नहुने बताउनुभयो ।
नेपालमा प्याराग्लाइडिङ, र्याफ्टिङ, क्यानोनिङ, रक क्लाइमिङ, माउन्टेनियरिङ, बन्जी, जिपलाइन जस्ता साहसिक पर्यटनका क्षेत्रमा निजी क्षेत्रले अर्बौं लगानी गरेको छ ।
