काठमाडौं । नेपाल शिक्षक महासंघले सामुदायिक विद्यालयका शिक्षक तथा कर्मचारीको वृत्ति विकास र पेशागत सुरक्षा तथा सुनिश्चितताको माग गर्दै काठमाडौँ केन्द्रित अनिश्चितकालीन शैक्षिक सडक आन्दोलन घोषणा गरेको छ ।
महासंघले पत्रकार सम्मेलन गरेर अनिश्चितकालीन आन्दोलन घोषणा गरेको हो । सरकारसँग विगतमा भएका सहमति कार्यान्वयन गरी स्थायी, राहत, साविक उच्च मावि, सिकाइ अनुदान, बालबिकास प्राविधिक धार लगायतका शिक्षकहरुको स्थायित्वको सुनिश्चतता गर्न माग महासंघले माग गरेको छ ।
विद्यालय शिक्षा ऐन जारी गर्नसमेत सरकार र सांसदहरुले बेवास्ता गरेको महासंघको आरोप छ । विद्यालय शिक्षा ऐन बनाउन माग गर्दै सामुदायिक विद्यालयका शिक्षक तथा कर्मचारी एक महिनादेखि आन्दोलनरत छन् ।
विद्यालय शिक्षा, विद्यार्थी र शिक्षक कर्मचारी मैत्री शिक्षा ऐन नभएसम्म आन्दोलन जारी राख्ने चेतावनीसहित जिल्ला–जिल्लाबाट शिक्षक तथा कर्मचारी राजधानी आएका हुन् । उनीहरुले एसईईको उत्तरपुस्तिका परीक्षण समेत बहिस्कार गरेका छन् ।
