भैरहवा। सुप्रिम सहकारी ठगी मुद्दामा उच्च अदालत तुलसीपुर, बुटवल इजलासको आदेशले शुक्रबार राति पक्राउ परेका रास्वपा सभापति एवम् गोर्खा मिडिया नेटवर्कका तत्कालीन प्रबन्ध निर्देशक रवि लामिछानेलाई सोमबार मात्रै अदालतमा पेस गरिने भएको छ।
अदालतले हिजो थुनामा राख्न आदेश दिएपछि प्रहरीले लामिछानेलाई शुक्रबार राति काठमाडौँबाट पक्राउ गरी आज बिहान भैरहवा पुर्याएको छ। आज र भोलि लामिछानेलाई जिल्ला प्रहरी कार्यालय रूपन्देहीको हिरासतमा राखिने प्रहरीले जनाएको छ ।
शनिबार र आइतबार सार्वजनिक बिदा छ । पहिला अदालत पेस गरेपछि मात्रै कारागार पठाउने प्रावधान भएकाले लामिछानेलाई प्रहरीले दुई दिन हिरासतमै राख्ने भएको हो । पर्सी अदालत खुलेपछि लामिछानेलाई पेस गरिने र त्यसपछि मात्रै कारागार चलान गरिने प्रहरी उपरीक्षक एसपी रञ्जितसिंह राठौरले बताउनुभयो ।
यसअघि हिजो लामिछानेलाई उच्च अदालत तुलसीपुर, बुटवल इजलासले थुनामा पठाउने आदेश दिएको थियो । जिल्ला अदालत रूपन्देहीले दिएको एक करोड धरौटी लिएर छाड्ने आदेश बदर गर्दै उच्च अदालतले लामिछानेलाई थुनामा पठाउने आदेश दिएको हो ।
गएको माघ १३ गते जिल्ला अदालत रूपन्देहीले रवि लामिछानेलाई एक करोड धरौटी रकम माग गरेको थियो भने छविलाल जोशीलाई माघ २९ गते पुर्पक्षका लागि कारागार चलान गरेको थियो ।
समान प्रकृतिको मुद्दामा एक जनालाई धरौटी र अर्कालाई थुना भएपछि सरकारी वकिल कार्यालय रविलाई पनि थुनामै राख्नुपर्ने माग गर्दै उच्च अदालत पुगेको थियो ।
