काठमाडौं । शिक्षा मन्त्रालयले आन्दोलनरत शिक्षकहरुलाई वार्तामा बोलाएको छ ।
मन्त्रालयले आज विज्ञप्ति जारी गर्दै आन्दोलनरत शिक्षकहरुसँग सान्दर्भिक छलफल गर्न र साझा धारणा निर्माण गर्न सरकार हमेशा तयार रहेको जनाएको हो । विद्यालय शिक्षा विधेयक स्वीकृतिको पखाईमा रहेकाले यसका लागि सामूहिक सन्देश प्रवाह गर्न मन्त्रालय सदैव सकारात्मक रहेको मन्त्रालयले विज्ञप्तिमार्फत जनाएको छ ।
विद्यालय शिक्षा ऐन तत्काल जारी गर्न माग गर्दै सामुदायिक विद्यालयका शिक्षकहरुले बुधबारदेखि काठमाडौंकेन्द्रित प्रदर्शन थालेका छन् । यसअघि धर्नालगायतका कार्यक्रम गर्दै आएका शिक्षकहरुले माग सुनुवाइ नभएको भन्दै काठमाडौकेन्द्रित प्रदर्शन गरेका हुन् ।
तर, शिक्षक महासंघले भने सरकारले बोलाएको वार्ताको औचित्य नरहेको प्रतिक्रिया दिएको छ । महासंघका अध्यक्ष लक्ष्मीकिशोर सुवेदीले अध्यादेशबाट भए पनि तत्काल विद्यालय शिक्षा ऐन जारी गर्नुपर्ने आफूहरुको माग रहेको बताउनुभयो ।
