काठमाडौं । इन्डियन प्रिमियर लिग-आईपीएलको १८औँ सिजनअन्तर्गत आज दुई रोमाञ्चक खेल हुँदै छन् । पहिलो खेलमा चेन्नई सुपर किंग्स र दिल्ली क्यापिटल्स प्रतिस्पर्धा गर्नेछन् ।
चेन्नईको एमए चिदम्बरम स्टेडियममा दिउँसो पौने ४ बजे खेल सुरु हुने छ । कप्तान रुतुराज गायकवाड घाइते भएका कारण एमएस धोनीले चेन्नईको नेतृत्व सम्हाल्ने सम्भावना छ ।
दिल्लीले यस सिजनका दुईवटै खेल जितेको छ भने चेन्नईले तीन मध्ये एक मात्र जित हात पारेको छ । दुई टोलीबीच हालसम्म खेलिएका ३० खेलमध्ये १९ खेल चेन्नईले जितेको छ ।
चेन्नईका लागी शीर्ष रन स्कोरर गायकवाड उपलब्ध नहुँदा टिमलाई केही घाटा लाग्न सक्छ । गायकवाडले जारी सिजन १ सय १६ रन बनाएका छन् । बलिङतर्फ नूर अहमदले ३ खेलमा ९ विकेट लिएका छन् । दिल्लीका स्टार बलर मिचेल स्टार्कले २ खेलमा ८ विकेट लिएका छन् ।
दोस्रो खेलमा पञ्जाब किंग्स र राजस्थान रोयल्स प्रतिस्पर्धा गर्दैछन् । यो खेल महाराजा यादवेंद्र सिंह स्टेडियम, मुल्लामपुरमा राति पौने ८ बजे सुरु हुने छ ।
पञ्जाब जारी प्रतियोगितामा २ खेल खेल्दा अपराजित छ । ३ खेलमा १ जित हात पारेको राजस्थान दोस्रो जितको खोजीमा हुनेछ ।
