रौतहत । रौतहट जिल्लाको कटहरिया नगरपालिकाले २०८० सालको माध्यमिक शिक्षा परीक्षा (एसईई )मा उत्कृष्ट नतिजा ल्याउने सामुदायिक विद्यालयका विद्यार्थीहरूलाई पुरस्कार वितरण गरेको छ ।
नगर प्रमुख अजय प्रकाश जैसवालले एक कार्यक्रमका बीच सामुदायिक विद्यालयहरूबाट ३ दशमलव ६० भन्दाबढी जीपीए ल्याउने विद्यार्थीहरूलाई पुरस्कार वितरण गर्नु भएको हो । तीन दशमलव ६० जीपीए भन्दामाथि ल्याएर ए-प्लस प्राप्त गर्ने पाँच जना विद्यार्थीहरूले ल्यापटप पुरस्कार पाएका हुन् ।
नगर प्रमुख जैसवालले विद्यार्थीहरूलाई दोसल्ल ओढाएर सम्मान गर्दै उज्ज्वल भविष्यको कामना गर्नुभयो । उहाले आफ्नो लगनशीलता र मेहनतले कटहरिया नगरपालिकाको प्रतिष्ठा बढाउनेमा विद्यार्थीहरूको योगदान महत्त्वपूर्ण रहेको बताउनु भयो ।
यसै अवसरमा एमबीबीएसमा अध्ययनरत स्थानीय राधेश्याम दासलाई अध्ययनका लागि आर्थिक सहयोग गर्ने प्रतिबद्धता पनि व्यक्त गर्नु भएको थियो । जैसवालले युवाहरूको शिक्षामा लगानी गर्न नगरपालिकाले विशेष योजना अघि सारेको र आगामी दिनमा यस्ता कार्यक्रमलाई निरन्तरता दिने बताउनु भएको छ ।
