काठमाडौं । नेपालबाट भारतमा काम गर्न गएकाहरुले अब नेपालमा पैसा पठाउन रेमिट्यान्स कम्पनीको सहारा लिनु नपर्ने भएको छ ।
अब भारतमा रहेका श्रमिकले आफ्नो खाताबाट नेपालमा रहेका आफन्तको खातामा सिधै रकम पठाउन सक्नेछन् । त्यस्तै नेपालमा काम गर्दै आएका भारतीय नागरिकले पनि भारतमा रहेका आफन्तलाई सिधै बैंक खातामा रकम भुक्तान गर्न सकिने भएको छ । तर, यो सुविधा भारतमा घुम्न, पढ्न, तिर्थयात्रा र उपचार गर्न जानेहरुले भने उपयोग गर्न पाउने छैनन् ।
नेपाल र भारतबीच अब व्यक्तिगत रुपमै एकअर्काको खातामा रकम पठाउन मिल्ने भएको छ । गत शनिबार परराष्ट्रमन्त्री शिशिर खनाल र भारतीय समकक्षी एस जयशंकरले भारतको नेसनल पेमेन्ट्स कर्पोरेसन अफ इन्डिया र नेपालको नेसनल पेमेन्ट्स इन्टरफेसबीचको आबद्धताको संयुक्त रूपमा सुरुआत गर्नु भएको हो ।
नेपालमा अहिले ८ वटा बैंकबाट यस्तो सेवा लिन सकिन्छ । फोन पेमार्फत क्यूआर गरेर कुनै बस्तु तथा सेवा खरिद गर्दा रकम तिर्न मिल्ने गरेको थियो । तर, अहिलेसम्म व्यक्तिले नै व्यक्तिको खातामा रकम पठाउन भने सकिँदैनथ्यो । अब यो सेवा सुरु भएसँगै भारतबाट एक पटकमा दुई लाख भारुसम्म नेपालमा व्यक्तिको खातामा पठाउन सकिन्छ।
मसिक रुपमा के कति सीमा राख्ने भन्नेचाहिँ अहिलेसम्म तोकिएको छैन । नेपालबाट भारतमा भने प्रतिकारोबार १५ हजार र मासिक १ लाख भारतीय रुपैयाँसम्म पठाउन मिल्नेछ । २०८० जेठ १८ गते तत्कालीन प्रधानमन्त्री पुष्पकमल दाहालको भ्रमणका बेलामा नेपाल क्लियरिङ हाउस र भारतको नेसनल पेमेन्ट कर्पोरेसन अफ इन्डियाबीच सीमापार डिजिटल भुक्तानी सम्झौता भएको थियो ।
त्यसको कार्यान्वयन भने शनिबारबाट मात्रै भएको हो । अब दुवै देशका नागरिकले एक अर्काको बैंक खातामा सिधै रकम पठाउन खुला भएको छ । अब एभरेष्ट, ग्लोबल आइएमई, माछापुच्छ्रे, नबिल र नेपाल एसबिआइ बैंकमार्फत रकम प्राप्त गर्न तथा भुक्तानी दुबै गर्न मिल्छ ।
हिमालयन, एनएमबी र सिद्धार्थ बैंकबाट प्राप्त मात्रै गर्न सकिनेछ । तर, भारतमा घुम्न, पढ्न, तिर्थयात्रा र उपचार गर्न जानेहरुले भने यो सुविधाको उपयोग गर्न सक्नेछैनन् । यो सुविधाले हुन्डीजस्ता अवैध कारोबारलाई निरुत्साहित गर्ने र भारतमा रहेका नेपाली श्रमिकहरूलाई सुरक्षित रूपमा घरमा पैसा पठाउन ठूलो मद्दत पुग्ने विश्वास गरिएको छ ।
.png&w=400&height=300)
.png&w=400&height=300)
