हेटौंडा । हेटौंडा सिमेन्ट उद्योगको आगो बाल्ने भट्टीको उपकरण बिग्रिएपछि उत्पादन रोकिएकोमा सो उपकरणको मर्मत गरी बुधबारदेखि फेरि उत्पादन सुरू भएको छ ।
उद्योगले यही चैत १४ गते करिब सात महिनापछि सिमेन्ट उत्पादन सुरू गरेको थियो । त्यसको भोलिपल्टै आगो बाल्ने भट्टीको केही उपकरण बिग्रिएपछि उत्पादन बन्द गर्नुपरेको थियो । उद्योगको भट्टीमा गएराति कोइला बालेर बुधबारदेखि क्लिङ्कर उत्पादन कार्य सुरू गरिएको जनाइएको छ ।
उद्योगमा सिमेन्ट उत्पादन नियमित गर्न आगामी दुई महिनासम्म पुग्ने कोइला जगेडामा राखिएको छ । बाँकी आवश्यक कोइला खरिदका लागि बोलपत्र आह्वान गरिसकेको हेटौंडा सिमेन्ट उद्योग प्रशासन महाशाखाका सहायक प्रबन्धक विकास श्रेष्ठले जानकारी दिनुभयो ।
उहाँका अनुसार कोइला खरिद गर्न आर्थिक अभाव भएका कारण पटक–पटक उत्पादनमा अवरोध आएको हो । उद्योगको साविक उत्पादन क्षमता दैनिक १८ हजार बोरा भए पनि उपकरण जीर्ण हुँदा हाल दैनिक ११ हजार बोरा मात्रै उत्पादन भइरहेको छ ।
उद्योगबाट उत्पादित सिमेन्ट काठमाडौं, नेपालगञ्ज, पोखरा, हेटौंडा, वीरगन्जलगायत सहरमा बिक्रीवितरण हुँदै आएको छ ।
.png&w=400&height=300)
.png&w=350&height=150)
