कञ्चनपुर । सीप, साहस र सङ्कल्प । यिनै तीन शब्दले बदलिदिएको छ कञ्चनपुरको बेलौरी-८ का बुद्धिराम डगौराको जीवन ।
सानो लगानीबाट सुरू भएको उद्योगमा बनेका सिरक डसना अहिले धेरैको वेड विस्तारामा प्रयोग भइरहेका छन् । कञ्चनपुरको बेलौरी नगरपालिका-८ काेलकाताका बुद्धिराम डगौराले विगत ८ वर्षदेखि गाउँमै सिरक तथा डसना उद्योग सञ्चालन गर्दै आउनु भएको छ । साउनदेखि वैशाखसम्म वर्षको नौ महिना चल्ने यो उद्योग रोजीरोटीको भरपर्दो स्रोत बनिसकेको छ ।
बुद्धिरामले ८ वर्षअघि दुई लाख ८० हजार रूपैयाँ लगानी गरेर यो उद्योग सुरू गर्नु भएको थियो । सुरूमा धेरै चुनौतीहरूको सामना गर्नु परे पनि निरन्तरको मेहनत र लगनशीलताले आज यस उद्योगबाट राम्रो आम्दानी भइरहेको छ । यो उद्योगमा बुद्धिरामले मात्र होइन, थप चार जनाले रोजगारी पाउनुभएको छ ।
रोजगारी सिर्जना, आत्मनिर्भरता र 'म पनि सक्छु' भन्ने भावना बुद्धिराममा पाइन्छ । लाखौं रकम खर्चेर विदेश जाने लहडका बीच गाउँमै मेहनतले, धैर्यले र निरन्तरताले सबै सम्भव हुन्छ भन्ने कुरा बुद्धिरामले प्रमाणित गरिदिनु भएको छ । सफलता रातोरात पाइन्छ भन्ने होइन । सपना र लगानी सानो भए पनि मेहनत र लगनशीलताले ठूलो उपलब्धिमा परिणत हुन्छ । बुद्धिराम डगौराको सफल व्यवसाय स्थानीय युवाका लागि प्रेरणाको स्रोत बनेको छ ।
