काठमाडौं । शनिबारदेखि सोमबारसम्म परेको भारी वर्षाले सडक पूर्वाधारमा जस्तै उर्जा क्षेत्रमा पनि ठूलो क्षति पुगेको छ ।
स्वतन्त्र उर्जा उत्पादकहरूको संस्था इप्पानका अनुसार १६ वटा जलविद्युत् परियोजना बन्द भएका छन् । इप्पानका अध्यक्ष गणेश कार्कीले एक दर्जन परियोजनामा ठूलो क्षति पुगेको र केहीको मर्मत गरेर पुनः सञ्चालनमा ल्याउन सकिने अवस्था रहेको बताउनुभयो ।
त्यस्तै बाढी र पहिरोले निर्माणाधीन २० परियोजनामा क्षति पुगेको छ । आर्थिकरूपमा भएको क्षतिको विवरण अझै प्राप्त भइनसकेको इप्पानका अध्यक्ष कार्कीले जानकारी दिनुभयो। यता सडक पूर्वाधारतर्फ भने बीपी र मेची राजमार्ग सबैभन्दा धेरै क्षति भएको छ ।
अन्य राजमार्गमा पहिरो र बाढीले सामान्य क्षति पुर्याए पनि सडक मर्मत गरेर सवारी साधन सञ्चालन गर्न थालिएको छ । तर बीपी र मेची राजमार्ग पुनः सञ्चालनमा आउन हप्ता दिन लाग्ने देखिएको छ । सडकमा भएको आर्थिक क्षतिको सबै विवरण अझै आएको छैन ।
सडक, उर्जा, सिंचाई, कृषिलगायतका क्षेत्रमा भएको क्षतिको आंकलनसहित पुनर्स्थापना र पुनर्निर्माणलगायतका विषयमा निर्णय लिन प्रधानमन्त्री नेतृत्वको राष्ट्रिय विपद् जोखिम न्यूनीकरण तथा व्यवस्थापन प्राधिकरणको परिषद् बैठक भोलि अर्थात् मंगलबार बस्दैछ ।
