काभ्रे । काभ्रेका ९१ वटा विद्यालयको बेरूजु ५१ करोडभन्दा धेरै छ । केन्द्रीय आयोजना कार्यान्वयन इकाइले निर्माण थालेका विद्यालय भवन रकम अभावले अधुरै रहँदा करोडौं बेरूजु छाडेर जिल्लास्थित कार्यालय खारेज भइसकेको छ ।
बेरूजु फछ्र्योटका लागि ताकेता भइरहे पनि विद्यालयहरूले यसलाई गम्भीरतापूर्वक लिएको देखिएको छैन । जिल्ला शिक्षा समन्वय इकाइ काभ्रेको पछिल्लो तथ्यांकअनुसार जिल्लाभरका सरकारी विद्यालयको बेरूजु ५१ करोडभन्दा धेरै छ ।
२०७२ सालको भूकम्पपछि २०७८ सालसम्म काभ्रेका सरकारी विद्यालयको भौतिक निर्माणमा नेपाल सरकार, एसियाली विकास बैंक, भारत सरकार र विभिन्न गैरसरकारी संस्थाको सहयोगमा ७ अर्ब ६६ करोड २० लाख रूपैयाँ खर्च भएको छ ।
जिल्ला शिक्षा समन्वय इकाइले विद्यालयको बेरूजु मध्ये सबैभन्दा धेरै यसै क्रममा भएको जनाएको छ । कार्यालयकाअनुसार निर्माण तर्फको बेरूजु ४८ करोड ७ लाख २ हजार ७ सय र अन्य बेरुजु ३ करोड १४ लाख ८९ हजार ९८७ गरी कुल ५१ करोड २५ लाख ५२ हजार ६८६ रहेको छ ।
यसैबीच कार्यालयले बेरूजु फछ्र्योटको कार्य सुरू गर्ने जनाएको छ । महाभारत गाउँपालिकाका १३ वटा विद्यालयको बेरूजु ३ करोड ९८ लाख ५७ हजार छ ।
भूकम्पपछि निर्माण थालिएका दुई विद्यालय अलपत्र पर्दा बेरूजु टाउको दुखाइको विषय बनेको छ । शिक्षाजस्तो संवेदनशील क्षेत्रमा भएको बेरूजु फछर्यौटको अन्योल अन्त्यका लागि तीनै तहका सरकार र मातहतका कार्यालय समन्वय आवश्यक देखिएको छ ।
