काठमाडौं । नेपालको सबैभन्दा ठूलो विकास साझेदार संस्था विश्व बैंकले आउँदो सात वर्षमा २ दशमलव ७ अर्ब अमेरिकी डलर सहयोगको घोषणा गरेको छ ।
'नेपाल राष्ट्र साझेदारी रूपरेखा सहकार्य' कार्यक्रममा विश्व बैंकका अधिकारीहरूले आउँदो सात वर्षमा नेपालमा गुणस्तरीय रोजगारी सिर्जना तथा अर्थतन्त्रको विकासमा सहयोग पुग्ने गरी कार्यक्रम सञ्चालन गर्ने बताएका छन् ।
त्यस्तै जलवायु परिवर्तनको असरलगायत प्राकृतिक विपद्प्रतिको उत्थानशीलता वृद्धिमा कार्यक्रम केन्द्रित हुने उनीहरूले बताए । कार्यक्रममा अर्थमन्त्री विष्णु पौडेलले विश्व बैंकले तयार पारेको नयाँ कार्यक्रमले १६औं योजनाले लिएका लक्ष्य पुरा गर्न सहयोग पुग्ने बताउनुभयो ।
विश्व बैंकले सुरू गरेको 'नेपाल राष्ट्र साझेदारी रूपरेखाले' आप्रवासन र विप्रेषणमाथिको निर्भरता कम गराउने बताइएको छ । कार्यक्रमले डिजिटल पूर्वाधार विस्तार र वृद्धिलाई प्राथमिकता दिएको छ ।
उर्जा व्यापारलाई सुदृढ बनाउन नवीकरणीय उर्जाको सहायता लिने जस्ता लक्ष्य पनि लिइएको छ ।
