काठमाडौं । उर्जा, जलश्रोत तथा सिंचाईमन्त्री दीपक खड्काले लोडसेडिङको हल्ला सामाजिक सञ्जालको हल्ला मात्रै भएको बताउनुभएको छ ।
बुधबारको पूर्वाधार विकास समितिको बैठकमा बोल्दै मन्त्री खड्काले यस्तो बताउनुभएको हो । उहाँले बजारमा आएका हल्लाहरू सस्तो लोकप्रियताका लागि आएका बताउनु भयो ।
उहाँले मर्मतसम्भारबाहेक अन्य कुनैपनि बहानामा लोडसेडिङ्ग नहुने बताउनु भयो । उहाँले बेला बखत विद्युत विच्छेद हुने अवस्था आजमात्रै नभइ यसअघिको वर्षहरूमा पनि भएको बताउनु भयो ।
उहाँले गत वर्षमा पनि वर्षमा ७ सय घण्टासम्म यसरी विभिन्न पटक विद्युत गएको दाबी गर्नुभयो । कहिले हावाहुरी, कहिले ठूला ठूला पोल ढलेका कारण, कहिले मान्छेकै कारण पनि विद्युत आपूर्तिमा समस्या भएको उहाँले उल्लेख गर्नुभयो ।
मन्त्री खड्काले मुलुकको भविष्य विद्युत क्षेत्रमा रहेको दाबी समेत गर्नुभयाे।
