काठमाडौं । विमानस्थल सञ्चालनमा आएको २६ महिनापछि पोखराबाट नियमित अन्तर्राष्ट्रिय उडान सुरू भएको छ। हिमालय एयरलाइन्सले चीनको स्वशासित क्षेत्र तिब्बतको राजधानी ल्हासाबाट पोखरा उडान सेवा सुरू गरेको हो। यस्तो उडान सातामा एकपल्ट हुनेछ।
यसअघि यो विमानस्थलबाट चीन, भारत र भुटानमा अन्तर्राष्ट्रिय ‘चार्टर’ उडान भएको थियो। पछिल्लोपल्ट चीनको सिचुवान एयरलाइन्सले छेङ्दु-पोखरा व्यावसायिक चार्टर उडान गरिरहेको छ। हिमालयको जहाज ल्हासाबाट सोमबार दिउँसो १ सय ७ जता यात्रु लिएर पोखरा अवतरण गरेको थियो ।
पहिलो उडानमा आएका यात्रुलाई गण्डकी प्रदेशका मुख्यमन्त्री सुरेन्द्रराज पाण्डे, संस्कृति, पर्यटन तथा नागरिक उड्डयन राज्यमन्त्री अरुणकुमार चौधरीलगायतले स्वागत गर्नुभएको थियो ।
यो जहाजले आज बिहान पोखरा अन्तर्राष्ट्रिय विमानस्थलबाट उडान भरी ल्हासा पुगेको छ। यही तालिकाअनुसार हरेक साता उडान हुनेछ।
एयरलाइन्सले काठमाडौं–ल्हासा-पोखरा-ल्हासा-काठमाडौं सेक्टर जोड्ने तथा मागका आधारमा आगामी दिनमा उडान पनि थप्ने योजनासहित हाल सातामा एउटा उडान सञ्चालन गरेको हो।
