काठमाडौं । त्रिभुवन अन्तर्राष्ट्रिय विमानस्थल आजदेखि १८ घण्टा सञ्चालनमा आउने भएको छ । विमानस्थल स्तरोन्नति गुरू योजनाअन्तर्गत रनवेको २५ मिटरभित्र समानन्तर ट्याक्सी वे, ह्यांगर र एप्रोन निर्माण गर्न गत कात्तिक २३ गतेदेखि विमानस्थल १० घण्टा बन्द गरिएको थियो ।
स्तरोन्नतिको कामले गति लिएपछि फेब्रुअरी १ देखि बन्दको समय २ घण्टा घटाएर काम भइरहेको थियो । अब भने बिहान ६ बजेदेखि राति १२ बजेसम्म विमानस्थल सञ्चालनमा आउने छ ।
त्रिभुवन विमानस्थल स्तरोन्नति गुरूयोजनाले १५ अर्ब खर्च गरेर धावनमार्गको दक्षिणतर्फ समानान्तर ट्याक्सी-वे, उत्तर पश्चिमतर्फ एप्रोन र उत्तरतर्फ एप्रोन, ह्यांगर निर्माण गर्नुका साथै एप्रोन र ट्याक्सी-वे जोड्ने मार्ग निर्माण गरेको थियो ।
रन वेको २५ मिटरभित्रको काम सकिए पनि बाहिरको काम जारी नै रहेकाले रातिको समयमा अझै ६ घण्टा बन्द गर्नुपर्ने आयोजनाले जनाएको छ । विमानस्थल स्तरोन्नतिसँगै १८ घण्टा खुल्ने भएपछि थप दुई भारतीय एयरलायन्सले उडान गर्ने भएका छन् ।
हप्ताको सातै दिन उडान गर्नेगरी स्पाईस जेड र एयर इण्डिया एक्प्रेसले यो सिजनका लागि उडान अनुमति मागेको त्रिभुवन विमानस्थलका महाप्रबन्धक जगन्नाथ निरौलाले जानकारी दिनुभयो ।
