काठमाडौं । बैंकहरूको नाफा गत वर्षको तुलनामा घटेको देखिएको छ । गत वर्षको दोस्रो त्रैमास अर्थात् पुससम्म २८ अर्ब ७६ करोड नाफा कमाएका २० बैंकहरूले यो वर्षको सोही अवधिमा २७ अर्ब ४३ करोड कमाएका छन् । अर्थात् बैंकहरूको नाफामा ४.६२ प्रतिशतले गिरावट आएको छ ।
२० बैंकमध्ये ९ वटा बैंकको नाफामा गिरावट देखिएको छ । ११ वटा बैंकको भने नाफा केही बढेको छ। नियमित ब्याज र किस्ता नउठेकाले बैंकहरूको खराब कर्जा पनि बढेको देखिएको छ ।
ऋण विस्तार सुस्त भएका बेलामा कर्जा असुलीमा नै समेत समस्या देखिएको छ । दोस्रो त्रैमाससम्ममा २० वटा वाणिज्य बैंकमध्ये १९ वटाको खराब कर्जा बढेको छ भने एभरेष्ट बैंकको मात्रै खराब कर्जा घटेको छ । गत आर्थिक वर्षको पुस मसान्तसम्म २० वटा बैंकहरुको औसत खराब कर्जा ३ दशमलव चार-शून्य रहेकामा यो वर्षको सोही अवधिमा १.०९ बिन्दुले बढेर ४ दशमलव चार नौ प्रतिशत पुगेको छ ।
नेपाल राष्ट्र बैंकले बैंकहरूलाई खराब कर्जा ५ प्रतिशतको सिमामा राख्न निर्देशन दिएको छ । ५ प्रतिशतको सीमा नाघेमा राष्ट्र बैंकले बैंकहरूलाई लाभांश वितरणमा नै रोक लगाउँछ । खराब बनेका कर्जाको बैंकहरूले सतप्रतिशत रकम प्रोभजनिङ गर्नुपर्ने राष्ट्र बैंकले व्यवस्था गर्दै आएको छ ।
