सिन्धुपाल्चोक । अन्तर्राष्ट्रिय बजारका लागि नेपाली कफी उत्पादक तथा निर्यातकर्ताको आपूर्ति क्षमता बढाउने उद्देश्यले सिन्धुपाल्चोकमा दुई दिने तालिम दिइएको छ ।
राष्ट्रिय चिया तथा कफी विकास बोर्ड चिया तथा कफि विकास कार्यालय नुवाकोटले सिन्धुपाल्चोकका ३३ जना किसानलाई प्राङगारिक कफी चक्र प्रविधिसम्बन्धी तालिम दिएको छ ।
किसानलाई कफीको बिरुवा रोप्नेदेखि कफी खानेसम्मको विधिबारे जानकारी दिइएको हो । किसानलाई कफीको नर्सरी उत्पादन गर्ने, बीउ छर्ने, बिरुवा रोप्ने, गोडमेल गर्ने, काँटछाँट गर्ने, बढी फल फलाउने, टिप्ने, बोक्रा छोडाउने, सुकाउने, पिस्नेदेखि बजार व्यवस्थापनबारे तालिम दिइएको छ ।
किसानले आफै लगाएका कफीको बोटले राम्रो फल दिइरहेको र गुणस्तर पनि राम्रो पाइएकाले सिन्धुपाल्चोकमा कफीबाट आम्दानी राम्रो हुने सम्भावना रहेको प्रशिक्षक कफि बोर्डका कृषि प्रविधिक एकराज फुँयलले बताउनुभयो ।