काठमाडौं । चालु आर्थिक वर्षको ७ महिनासम्म नेपालले ८ खर्ब ११ अर्बको व्यापार घाटा व्यहोरेको छ । यस अवघिमा वैदेशिक व्यापार भएका १ सय ५७ देशमध्ये १ सय २१ सँगको व्यापार घाटामा छ ।
चालु आर्थिक वर्षको यो अवघिसम्म कुल ८ खर्ब ९७ अर्ब ९४ करोडको वस्तु आयात हुँदा ८६ अर्ब ८३ करोड रुपैयाँको मात्रै निर्यात भएको छ । गत वर्षको तुलनामा आयात २ दशमलब ३१ प्रतिशत र निर्यात ७ दशमलब शून्य ७ प्रतिशत घटेको हो ।
यो अवधिमा डिजेल ७७ अर्बको, पट्रोल ३८, खाना पकाउने ग्यास ३०, स्मार्ट फोन १७, सुन १२ अर्बको आयात भएको छ । त्यस्तै कोइला १२, फलाम ४४ र औषधि र त्यसको कच्चापदार्थ १६ अर्बको आयात भएको छ । चालु आर्थिक वर्षको यो अवधिसम्म ४ अर्बको अलैंची, ६ अर्बको गलैंचा , ३ अर्बको जुस, २ अर्बको पाम र ६ अर्ब ९६ करोडको स्टिल आइरन निर्यात भएको छ ।
