काठमाडौं । आठ वर्षअघि बिक्री गरेको उखुको पैसा नपाएको भन्दै कपिलवस्तुका किसान एक सातादेखि काठमाडौंमा धर्नामा छन् । तर आफ्ना माग सुनुवाइमा अहिलेसम्म कसैले चासो नदेखाएको गुनासो उनीहरुले गरेका छन् ।
वीरेन्द्र कनोडिया सञ्चालक रहेको महालक्ष्मी सुगर मिलले अनुदानको करिब साढे दुई करोड रुपैयाँ हिनामिना गरेको आरोप किसानहरुको छ । २०७२ सालमा ४६१ रुपैयाँ प्रतिक्विन्टल उखुको मूल्य निर्धारण हुँदा किसानलाई सरकारले २५ रुपैयाँ अनुदान दिएको थियो । तर किसानको पैसा नदिई मिल कपिलवस्तुबाट सर्लाही सरिसकेको छ । किसानहरुले भने साढे दुई करोड रुपैयाँ वितरण नहुँदासम्म आन्दोलन जारी राख्ने कृषक उमेशप्रसाद चौधरीले जनाए ।
यता कृषि तथा पशुपन्छी विकास मन्त्रालयले भने उद्योगीका नाममा गएको पैसाको रुजु गर्ने विषयमा अर्थ मन्त्रालयमा परिपत्र गरेको जनाएको छ । महालक्ष्मी सुगर मिलले उद्योगको खातामा पैसा नआएको जनाएको छ । २५ रुपैयाँ अनुदान कोष तथा लेखा नियन्त्रण कार्यालयमार्फत किसानको बैंक खातामा गएको सञ्चालक वीरेन्द्र कनोडियाले जानकारी दिए । समस्या समाधान गर्ने विषयमा उद्योग, अर्थ र कृषि मन्त्रालयबीच कुराकानी भएको कृषिमन्त्री वेदुराम भुसालको सचिवालयले जानकारी दिएको छ ।