काठमाडौं । देशका विभिन्न ठाउँमा बैंक तथा वित्तीय संस्थाका कर्मचारीमाथि आक्रमणका घटना बढ्न थालेपछि यस क्षेत्रका छाता संगठनहरुले दोषीलाई कारबाहीसहित सुरक्षा प्रत्याभूतिको माग गरेका छन् ।
नेपाल बैंकर्स संघ, डेभलमेन्ट बैंकर्स एसोसिएसन, नेपाल वित्तीय संस्था संघ र नेपाल लघुवित्त बैंकर्स संघले आज (शुक्रबार) संयुक्त विज्ञप्ति जारी गर्दै यस्ता अराजक गतिविधि रोक्न र दोषीमाथि कारबाही गर्न माग गरेका हुन् ।
उनीहरुले पछिल्लो समय केही व्यक्ति तथा समूहले बैंक, वित्तिय संस्था तथा लघुवित्त संस्थाका कर्मचारीमाथि लक्षित गरी दिएको धम्कीपूर्ण अभिव्यक्ति, अराजक व्यवहार र सांघातिक आक्रमणको निन्दा गरेका छन् ।
विज्ञप्तिमा जाजरकोट, मकवानपुर, म्याग्दी, सुनसरी, उदयपुर, कपिलवस्तु, रुपन्देही, कास्कीलगायत क्षेत्रमा कर्मचारीमाथि आक्रमण र कार्यालयमा तालाबन्दी गरिएको उल्लेख गर्दै यस्ता घटना प्रोत्साहन गर्नेलाई कानुनी दायरामा ल्याउन माग गरिएको छ ।
यस्ता घटना नरोकिएसम्म र कर्मचारीको सुरक्षा प्रत्याभूति नहुन्जेलसम्म बैंकिङ सेवा नै सञ्चालन गर्न नसक्ने अवस्था रहेको संयुक्त विज्ञप्तिमा जनाइएको छ । हिजो दिउँसो मात्रै म्याग्दीमा एनआईसी एसिया बैंकका शाखा प्रमुख विनोद सापकोटा र कार्यालय सहायक प्रकाश आलेमाथि आक्रमण भएको थियो ।
