काठमाडौं । सर्वोच्च अदालत बार एसोसियसनद्वारा प्रकाशित ‘स्मृतिमा सुवास नेम्वाङ’ स्मृति ग्रन्थ सार्वजनिक भएको छ ।
काठमाडौँमा सोमबार आयोजित कार्यक्रममा सर्वोच्च अदालतका वरिष्ठतम् न्यायाधीश सपना प्रधान मल्लले स्मृति ग्रन्थको विमोचन गर्नुभएको हो । उहाँले संविधान निर्माण र संक्रमणाकालीन न्यायलाई सफल बनाउनसमेत नेम्वाङको महत्त्वपूर्ण योगदान रहेको स्मरण गर्नुभयो ।
राजनीतिक दलहरु विभाजित भएको अवस्थामा पनि समन्वयकारी भूमिका निभाउँदै सबैलाई मिलाउन सक्ने खुबी भएका नेता नेम्वाङको आवश्यकता मुलुकलाई खड्किएको कार्यक्रममा सहभागी नेता तथा कानुनका विज्ञहरुले बताए ।
सरल स्वभाव एवं बौद्धिक र कूटनीतिक विचारका धनी नेम्वाङको स्मृति ग्रन्थमा राजनीतिक आयाम, संविधान निमार्णमा गर्नुभएको महत्त्वपूर्ण योगदानलगायत ४३ वटा लेख संग्रहित छन् । स्मृति ग्रन्थ ३ सय ८० पृष्ठको छ ।
