काठमाडौं । यस वर्षको युगकवि सिद्धिचरण पुरस्कार उषा ठाकुरलाई प्रदान गरिएको छ ।
युगकवि सिद्धिचरण श्रेष्ठको ११३औं जन्मजयन्तीका अवसरमा युगकवि सिद्धिचरण प्रतिष्ठानद्वारा आयोजित कार्यक्रममा प्राध्यापक ठाकुरलाई एक लाख राशिको पुरस्कारबाट सम्मान गरिएको हो ।
यस्तै, ४० हजार राशिको युगकवि सिद्धिचरण युवा पत्रकारिता पुरस्कार नेपाल टेलिभिजनका ओखलढुंगा संवाददाता नवराज कार्कीलाई प्रदान गरियो । समारोहमा प्रधानमन्त्री केपी ओलीले प्रतिष्ठानद्वारा प्रकाशित ‘युगकवि सिद्धिचरणका गद्य कविता’ र ‘विज्ञका दृष्टिमा युगकवि’ नामक दुईवटा कृति विमोचन गर्नुभएको थियो ।
त्यस अवसरमा उहाँले युगकविका रचनाबाट आफू ज्यादै प्रभावित भएको बताउनुभयो । युगकविका रचनाको प्रेरणाले युवाहरू क्रान्तिमा होमिएको उदाहरण पनि उहाँले दिनुभएको थियो ।
