डा. रुइत र पत्रकार चन्द्रकिशोर पुरस्कृत

श्रावण १२, २०८१ |कान्तिपुर टीभी संवाददाता
डा. रुइत र पत्रकार चन्द्रकिशोर पुरस्कृत

काठमाडौं । कर्मयोगी बद्रीविक्रम थापा स्मृति सेवा गुठीले वरिष्ठ नेत्ररोग विशेषज्ञ डा. सन्दुक रुइत र पत्रकार तथा लेखक चन्द्रकिशोरलाई पुरस्कृत गरेको छ । 

शुक्रबार काठमाडौंमा आयोजित कर्मयोगी बद्रीविक्रम थापाको १०२औँ जन्मस्मृति सभामा गुठीले २०८१ सालको ‘बद्रीविक्रम राष्ट्रगौरव पुरस्कार’ वरिष्ठ नेत्ररोग विशेषज्ञ रुइतलाई समर्पण गर्‍यो । त्यस्तै यस वर्षको ‘सेवा पुरस्कार नेपाल’ पत्रकार तथा लेखक चन्द्रकिशोरलाई समर्पण गर्‍यो । कार्यक्रमका प्रमुख अतिथि दिव्य शताब्दी पुरुष डा. गौरीशंकर लाल दासले दुवै व्यक्तित्वलाई पुरस्कृत गर्नुभयो ।

पुरस्कृत व्यक्तित्वहरूलाई पुरस्कारका साथ नगद जनही २ लाख २२ हजार २ सय २२ रुपैयाँ प्रदान गरियो । कार्यक्रममा यस वर्षको ‘बद्रीविक्रम चरित्र निर्माण पुरस्कार’ हिन्दु विद्यापीठ थलीका छात्र अनुप दाहाललाई प्रदान गरियो । प्रा.डा. लोकविक्रम थापाद्वारा स्थापित यस पुरस्कारकासाथ नगद १० हजार प्रदान गरियो । कार्यक्रममा गुठीको स्मारिका ‘सेवा नेपाल’को कृष्णप्रसाद भट्टराई विशेष अंक र विशेष ग्रन्थ ‘किसुनजी’ लोकार्पण गरियो ।

सोही अवसरमा गुठीका सल्लाहकार तथा श्रम, रोजगार तथा सामाजिक सुरक्षामन्त्री शरतसिंह भण्डारीले श्रीमती पुनमाया महर्जनलाई नगद २५ हजारसहित श्रम सम्मान समर्पण गर्नुभयो ।कार्यक्रममा प्रमुख अतिथि डा. गौरीशंकर लाल दासले समाजका विशिष्ट व्यक्तित्वहरूलाई सम्मानित गर्न पाउँदा आफैं सम्मानित भएको अनुभव गरेको बताउनुभयो । 

कार्यक्रममा गुठीका अध्यक्ष प्रा.डा. सुरेशराज शर्मा, कोषाध्यक्ष किरण थापा, सदस्य श्रीओम रोदन र हरि मञ्जुश्रीले बोलेका थिए ।


Image

कान्तिपुर टीभी संवाददाता

Kantipur TV HD, the most popular TV channel in Nepal, brings Nepal to its audiences. Its programmes provide in-depth analyses about the issues of the day and reflect the people’s voice.


Enter Kantipur TV HD
Advertisement