काठमाडौं । पछिल्ला दिनमा मिटरब्याजी पीडितहरू अनवरत आन्दोलनमा छन् । गत चैत २ गतेदेखि महोत्तरीको बर्दिबासबाट पैदलै हिँडेर उनीहरू राजधानी आए र प्रधानमन्त्रीलाई आफ्ना गुनासा एवं समस्याहरू सुनाए ।
बर्दिबासबाट हिँडेर बालुवाटार पुगेकी बालिकाले प्रधानमन्त्रीलाई सोधिन्– गाउँ सहरमा अदालत, थाना, सिडिओ कार्यालय किन बनेका ?
मिटरब्याजीको धम्कीले स्कुल छाड्नु परेको गुनासो उनै सिरहाकी १२ बर्सिया गरिमा रायको थियो ।
पीडितहरूका दुखेसा सुनिसकेपछि प्रधानमन्त्री पुष्पकमल दाहालले न्यायिक अधिकार प्राप्त उच्चस्तरीय छानबिन आयोग गठन गर्ने र मिटरब्याजी पीडितहरूको समस्या समाधान गर्ने आश्वासन दिए ।
मिटरब्याजपीडितसँगको छलफलमा प्रधानमन्त्री दाहालले फिल्डमै गएर तत्काल कारबाही गर्न सक्ने आयोग बनाइने प्रतिबद्धतासमेत जनाए ।
प्रधानमन्त्रीको उक्त आश्वासन पछि गत शनिबार अपराह्न गृह मन्त्रालयमा सरकार पक्ष र मिटरब्याजी पीडितबीच वार्ता भयो । पीडितहरूले आन्दोलन फिर्ता लिने गरी ५ बुँदे सहमति पनि बन्यो ।
तर सहमति गरेको चार दिन नबित्दै मिटरब्याजपीडितकै अर्को समूहले आन्दोलन सुरु गरेको छ । सरकार र पीडित पक्षबीच शनिबार भएको पाँच बुँदे सहमति झुटो भएको भन्दै उनीहरू सोमबारदेखि धर्ना दिई राखेका छन् ।
यसैबीच मिटरब्याजीबाट ठगिएपछि न्याय माग्न काठमाडौं आएका पीडितहरू आफ्ना दुखेसा सुनाउन कान्तिपुर टेलिभिजनको स्टुडियो मै पुगे र उनीहरूले आफ्ना पीडा पोखे ।
सुनौँ उनीहरूका समस्या र तीनको समाधानका लागि सोकारवालाहरूका जवाफ– यस हप्ताको सरोकारमा ।
