म्याग्दी । परम्परागत शैलीका घर, पृष्ठभूमिमा देखिने धौलागिरि हिमाल, समथर भूगोल कालोपत्रे सडक र त्यसको दायाँबायाँ फाँटमा फुलेको तोरीको सुन्दर दृश्यले जो कोहीलाई पनि लोभ्याउने गरेको छ ।
म्याग्दीको बेनी नगरपालिका-१ रत्नेचौर बस्तीस्थित खेतको फाँटमा फुलेको तोरीको दृश्य पर्यटनको गन्तव्य बन्दै गएको छ । फाँटमा फुलेको तोरीको सुन्दर दृश्यमा रमाउनका लागि अहिले दैनिक आन्तरिक पर्यटकको भीड नै लाग्ने गरेको छ ।
यहाँको फाँटमा गहुँको हरियाली र तोरीको रङमा रत्नेचौर मनमोहक देखिएको छ । चारैतिर हरियाली पहाड, उत्तरतर्फ मनमोहक हिमाल, बीचमा समथर फाँट र फुलिरहेका तोरीबालीले सुन्दरता थपेको छ । यही सौन्दर्यमा बालबालिका, युवायुवतीका साथै महिला, पुरुष रमाउने गरेका छन।
हिउँदयाममा पहेँलपुर फाँटले मन लोभ्याउने कारणले सबैको रोजाइ बनेको छ । तोरीखेतीको 'हब’का रूपमा विकास हुँदै गरेको रत्नेचौर गाउँको तोरीबारीमा रमाउन बागलुङ, पर्वत, कास्की र बेनीबाट दैनिक झन्डै पाँच सय आन्तरिक पर्यटक आउने गरेका छन् ।
झन्डै सात सय घर रहेको गाउँको बीचमा अवस्थित तीन सय रोपनी खेतीयोग्य जमीनमा लगाएको तोरीखेती रमाउने स्थानका रुपमा विकास भएको छ । बागलुङको कुडुले, फेदी र धार्मिक पर्यटकीय स्थल पञ्चकोट र बागलुङ कुडुले देखि रत्नेचौर जोडने गरि निमार्ण भएको नयाँ झोलुङ्गेपुलले यहाँ आउने आन्तरिक तथा बाहृय पर्यटक बढेका छन् ।
