.png&w=1000&height=550)
दाङ । लुम्बिनी प्रदेशस्तरीय दोस्रो मुख्यमन्त्री कप महिला तथा पुरूष भलिवल प्रतियोगिता दाङको घोराहीमा बुधबार सुरू भएको छ ।
चैत २८ गते सम्म चल्ने प्रतियोगिताको लुम्बिनी प्रदेशका मुख्यमन्त्री चेतनारायण आचार्यले उद्घाटन गर्नुभयो। लुम्बिनी प्रदेशका १२ जिल्लाका महिलाका १२ र पुरूषका १२ गरी २४ टोलीको सहभागिता रहेको छ । सहभागी टोलीले फिभाको नियमअनुसार लिगकम नकआउट प्रणालीमा खेल्नु पर्नेछ।
प्रतियोगिताका विजेताले नगद १ लाख, द्वितीय हुने टोलीले ६५ हजार र तृतीयले ३५ हजार पाउनेछन् । उत्कृष्ट खेलाडीलाई १० हजार तथा उत्कृष्ट पाँच विधाका खेलाडीलाई जनही ५ हजार रूपैयाँ नगदसहित पुरस्कृत गरिनेछ । गत वर्ष पुरूषतर्फ गुल्मी र महिलातर्फ पाल्पा पहिलो भएका थिए ।
बुधबार भएको खेलमा पुरूषतर्फ गुल्मी, पाल्पा र नवलपरासी विजयी भएका छन्। गुल्मीले दाङलाई सोझो सेटमा हराउँदा पाल्पासँग बाँके तीन शून्यको सेटमा पराजित भयो। त्यसैगरी नवलपरासीले रोल्पालाई चार सेटमा हराउँदा बर्दिया ३-० को सेटमा पराजित भएको हो।
बुधबार महिला तर्फ पाल्पा र रोल्पा बिजयी भए। पाल्पाले नवलपरासीलाई ३–० को सेटमा हराउँदै रुपन्देहीले प्युठानलाई पनि सोझो सेटमा नै पराजित गरेको हो।
