काठमाडौं । डिफेन्डिङ च्याम्पियन जनकपुर बोल्ट्सले नेपाल प्रिमियर लिग-एनपीएल २०२५ मा सबैभन्दा खराब प्रदर्शन गर्दै सुरूवाती चार मध्य चारवटै खेल हारिसकेको छ ।
टिमका मार्की खेलाडी फ्लप छन् । नियमित कप्तान बेञ्चमा हुँदा नयाँ कप्तान वायन पार्नेलको नेतृत्वमा पनि टिमले हारको श्रृंखलालाई अन्त्य गर्न सकेको छैन । अहिले जनकपुर लिग चरणबाट बाहिरिन सक्ने अवस्थामा पुगेको छ । बाँकी तीन खेल जिते पनि प्लेअफ पुग्न उसले अन्य टिमको नतिजामा भर पर्नु पर्ने छ र डिफेन्डिङ च्याम्पियनको गर्विलो मुकुट संकटमा पर्दा टिमलाई उकास्न ठूलै चमत्कारको आवश्यकता छ ।
साविक विजेता जनकपुर बोल्ट्स एनपीएल २०२५ मा सबैभन्दा खराब लयबाट गुज्रिरहेको छ । गत वर्ष फाइनलमा सुदूरपश्चिमलाई हराउँदै च्याम्पियन बनेको टोली यस पटक चार खेलमा चार हारसँगै लिग चरणबाटै बाहिरिने अवस्थामा पुगेको छ । निकै कठिन गणितीय सम्भावना मात्र कायम रहँदा समर्थकहरू निरास छन् ।
एनपीएलको दोस्रो सिजनको उद्दघाटन खेल । टीयू मैदानमा पहिलो पटक फ्लडलाइटमा खेल हुँदा टिकट सोल्डआउट भएका थिए । सबैको नजर जनकपुरमाथि थियो । तर, काठमान्डु गोर्खाजका मिलिन्द कुमारले ३ विकेट लिएपछि जनकपुरले ६ विकेट गुमाएर १ सय ३० रन मात्र बनाउन सक्यो । आशिफ शेखले ५४ रनको संघर्षपूर्ण अर्धशतक बनाए पनि बाँकी ब्याटिङ लाइन धरासायी भयो ।
आकाश त्रिपाठी र बेन चाल्र्सवर्थ बीचको ७० रनको ओपनिङ् साझेदारी समयमै तोड्न नसक्दा जनकपुरले हारसँगै प्रतियोगिताको सुरूवात गर्यो । काठमान्डुले १८ ओभरमै सहज जित हात पार्यो । दोस्रो खेलमा विराटनगर किंग्सविरूद्धको भिडन्तमा सन्दीप लामिछानेको जादू चल्यो । उनले ४ ओभरमा ११ रन खर्चेर ४ विकेट लिए । १ सय ३६ रनको सामान्य लक्ष्य पछ्याउँदा जनकपुरले ९ विकेट गुमाएर १ सय २६ रन मात्र बनाउन सक्यो ।
कप्तान अनिल शाह १४ बलमा ४ रनमा आउट भए । लाहिरु मिलान्था २३ र आशिफ १३ रनमा आउट भए । लोफ्टी इटनले ४१ रन बनाए पनि अन्य ब्याटरबाट साथ पाउन सकेनन् । तेस्रो खेलमा पोखरा एभेन्जर्सले जनकपुरलाई पाखा लगायो । १ सय ५६ रनको लक्ष्य पक्ष्याउने क्रममा पहिलो ओभरमै विपिन खत्रीले मार्की खेलाडी आशिफ शेखलाई गोल्डेन डक गरे ।
शुभ कंशकार पनि पहिलो ओभरमै बोल्ड आउट भए । चौथो ओभरमा सुमित बर्माले दुई विकेट झारे । दस ओभरसम्म जनकपुरले ५९ रन जोड्दा ६ विकेट गुमाइसकेको थियो । वायन पार्नेलले ३८ बलमा अर्धशतक बनाए पनि रिटायर्ड हर्ट हुन पुगे । २० ओभरमा नकपुर १ सय ३० रनमा अड्किए पछि पोखराले २५ रनको सहज जित हात पार्यो ।
सिजन सुरू हुनुअघि जनकपुर र सुदूरपश्चिमबीचको खेल सबैभन्दा चर्चामा थियो । गत सिजन फाइनलमा जनकपुसँग पराजित सुदूरपश्चिम बदला लिन तयार थियो । सुदूर अपराजित पनि थियो । जनकपुर लय समात्ने दाउमा लगातारको हारले टिम म्यानेजमेन्टले नियमित कप्तान अनिल साहलाई बेञ्चमा राख्दै वायन पार्नेलाई टिमको नेतृत्व दिइयो ।
उनी एनपीएलमा टिमको कप्तानी गर्ने पहिलो विदेशी खेलाडी बने । गत सिजनको फाइनलका हीरो लाहिरु मिलान्था पनि बेन्चमा सिमित थिए । आफ्नो चौथौं खेलमा सुदूरपश्चिमविरूद्ध पहिला ब्याटिङ गरेको जनकपुरका लागि सञ्जय कृष्णमूर्तिले ५० रन बनाए । असिफ लगातार दोस्रो खेलमा गोल्डेन डकआउट भए । अविनाश बोहराको ४ विकेट र स्कट कुग्लेलाइनले ३ विकेट लिएपछि जनकपुरले जेनतेन १ सय ४५ रन बनायो ।
इशान पाण्डे र विनोद भण्डारीले ९२ रनको साझेदारी गरेपछि सुदूरपश्चिम लगातार पाँच खेल जित्दै प्लेअफमा स्थान सुरक्षित गर्ने पहिलो टोली बन्यो । पुनरागमनको प्रयासमा रहेको जनकपुर भने यस खेल पछि पनि अंकविहीन रह्यो र तालिकाको पुछारमै छ ।
चार खेलमा चार हार । टोलीका मार्की खेलाडी आशिफ शेख फ्लप छन् । पार्नेलको नेतृत्वमा पनि टिमले पहिलो जित हात पार्न सकेन । समर्थकहरूको धैर्य टुटिसकेको छ । अब जकपुरले चितवन, लुम्बिनी र कर्णालीसँग खेल्न बाँकी छ । ती तीनवटै खेल जिते पनि बढीमा ६ अंक मात्र जुटाउन सकिन्छ ।
अब जनकपुरलाई प्लेअफमा पुग्न अन्य टिमको नतिजामा भर पर्नु पर्ने भएको छ । उसलाई अव अरुको हारले मात्र अघि बढाउन सक्छ । गत सिजन डिफेन्डिङ च्याम्पियनको सानदार इनिङ्स खेलेको जनकपुरको डुब्दै गरेको डुङ्गा जोगाउन खेलाडी र समर्थकको साथ मात्र पर्याप्त रहेन ।
