काठमाडौं । लगातार चार खेल जित्दै संकटा क्लब दुई खेल अगावै एन्फा महिला लिगमा छनोट भएको छ ।
महिला लिग छनोटअन्तर्गत शुक्रबार सम्पन्न खेलमा संकटाले लम्कि फुटबल एन्ड ट्रेनिङ सेन्टरलाई ६-१ ले पराजित गर्दै मुख्य ड्रमा स्थान सुनिश्चित गरेको हो ।
यससँगै संकटाले आगामी संस्करणको एन्फा महिला लिग खेल्ने छ । एन्फाको वार्षिक क्यालेन्डरअनुसार लिग यसै महिनाको तेस्रो सातादेखि सुरु हुने तालिका छ ।
च्यासल मैदानमा संकटालाई जित दिलाउन पूर्णिमा राईले दुई गोल गरिन् । सुक्रिया मिया, रेनिशा शर्मा, अनिशा राई र सेनु परियारले समान एक-एक गोलको योगदान दिए । लम्किका तर्फबाट मेनका शाहीले एक मात्र गोल फर्काइन् ।
लम्कीले खेलको ४१औं मिनेटमा मेनकाको गोलमार्फत अग्रता लिएको थियो । तर, दोस्रो हाफमा संकटा आक्रमक बन्दै खेलमा फर्कियो । ५०औं मिनेटमा सुक्रियाले बराबरी गोल गरिन् भने ५७औं मिनेटमा पूणिर्माले गोल गर्दै टोलीलाई २-१ ले अघि बढाइन् ।
त्यसपछि ७४औं मिनेटमा रेनिशाले, ७८औं मिनेटमा पुनः पूर्णिमाले, ८३औं मिनेटमा अनिशाले र इन्जुरी समयमा सेनुले गोल गर्दै संकटालाई ६-१ को सानदार जित दिलाए । जितसँगै चार खेलमा १२ अंक जोडेको संकटाले महिला लिगमा छनोट भएको छ । उ समूह बीको शीर्ष स्थानमा छ ।
पराजित लम्कीको समान खेलबाट एक अंक छ । १४ टोली सहभागी छनोट प्रतियोगिताबाट मुख्य लिगमा थप ४ टोलीले स्थान बनाउन बाँकी छ । आजै सम्पन्न अर्को खेलमा आरएस रिसोर्ट एन्ड बिच फुटबल क्लबले छहारी युवा क्लबविरुद्ध २-१ को जित दर्ता गर्यो ।
