काठमाडौं । युवा तथा खेलकुदमन्त्री तेजुलाल चौधरीले सीमित श्रोत साधनका बाबजुद नेपाली खेलाडीले सफलता प्राप्त गर्दै विश्वसामु देशको झण्डा फरफराएको बताउनुभएको छ ।
राष्ट्रिय खेलुकद परिषद् (राखेप) को ६२औं वार्षिकोत्सवको अवसरमा शुक्रबार मन्त्री चौधरीले सिमित श्रोत साधनबाट नेपाली खेलाडीको सफलताले ६ दशक लामो नेपाली खेलकुद बितेको उल्लेख गर्नुभएको हो ।
मन्त्री चौधरीले ती सफलताका लागि सबै खेलकर्मीलाई धन्यवाद दिँदै राखेपले खेलाडीका उपलब्धिहरूलाई प्रोत्साहन गर्न सम्मान गरेको उल्लेख गर्नुभयो । यस किसिमका सम्मानले खेलकर्मीलाई प्रोत्साहन मिल्ने र समग्र खेलले नै फड्को मार्ने उहाँको विश्वास छ ।
राखेपको कभर्डहलमा भएको कार्यक्रममा मन्त्री चौधरीले खेल क्षेत्रको विकासका लागि नेपाल सरकारले खेल पूर्वाधारका लागि लगानी बढाएको दाबी गर्नुभयो । जापानमा सन् २०२६ मा हुने २०औं एसियाली खेलकुदको दोहोरो अंकमा पदक जित्ने लक्ष्यसहित नेपाली खेलाडीहरूले अहिले विशेष तयारीमा रहेको उहाँको भनाइ छ ।
खेलाडीहरूलाई जतिसक्दो धेरै सेवा सुविधा दिन आफू लागिपरिरहेको उहाँ बताउनु हुन्छ । वाार्षिक क्यालेन्डर नै बनाएर राखेप अगाडि बढेको मन्त्री चौधरीले बताउनु भयो ।
उनले राष्ट्रिय खेलकुद विकास ऐन २०७८ लागू भएसँगै संघीयता कार्यान्वयनमा सहजता भएको बताउनु भयो । एउटा मात्रै फुटबल रंगशालामा दशरथ रंगशाला भएकाले उपत्यकाभित्र अन्तर्राष्ट्रिय रंगशाला बनाउने उद्देश्यले अहिले राखेपमार्फत सूर्यविनायकमा ५० हजार क्षमताको रंगशाला निर्माणको प्रक्रिया अगाडि बढाइएको मन्त्री चौधरीले उल्लेख गर्नुभयो ।
भलिबलको पनि रंगशाला निर्माणको प्रक्रिया पनि अगाडि बढाइने उहाँले विश्वास व्यक्त गर्नुभयो ।