काठमाडौं । भारतले एक खेल अगावै साफ यू-१७ महिला च्याम्पियनसिपको उपाधि जितेको छ ।
शुक्रबार सम्पन्न खेलमा नेपाललाई ५-० गोलको फराकिलो अन्तरले पराजित गरेसँगै भारत च्याम्पियन बनेको हो ।
आजै भएको दिनको पहिलो खेलमा घरेलु टोली भुटान र बंगलादेशले १-१ गोलको बराबरी खेलेपछि भारतले नेपाललाई पराजित गरेर च्याम्पियन बनेको हो । जारी प्रतियोगितमा नेपालको यो चौथो हार हो । पहिलो लेगमा नेपाल भारतसँग ७-० ले पराजित भएको थियो ।
भुटानको चाङ्लिमिथाङ रंगशालामा भारतका लागि पर्ल फर्नान्डेसले ह्याट्रिक गरेकी थिइन् भने दिव्यानी लिन्डाले दुई गोल गरिन्। भारतले पहिलो हाफमा ३ तथा दोस्रो हाफमा थप २ गोल गरेको थियो ।
डबल राउण्ड रोबिन लिग प्रणालीमा भइरहेको प्रतियोगितामा भारत ५ खेलमा १५ अंक जोडेर अपराजित रहँदै च्याम्पियन बनेको हो । बंगलादेश १० अंकसहित दोस्रो स्थानमा छ ।
५ खेलमा १ जित हात पारेको नेपाल तीन अंकसहित तेस्रो स्थानमा छ । भुटान भने जितविहीन भएर पुछारमा छ । प्रतियोगिताको अन्तिम दिन आइतबार नेपालले भुटान र बंगलादेशले भारतसँग प्रतिस्पर्धा गर्ने छन् ।
