काठमाडौं। नेपाली राष्ट्रिय क्रिकेट टोली साउथ अस्ट्रेलियाविरुद्धका दुवै टी-२० अभ्यास खेलमा पराजित भएको छ । पहिलो खेलमा तीन विकेटले पराजित भएको नेपाल आजै भएको दोस्रो खेलमा ३ रनले पछि पर्यो ।
पहिलो खेलमा साउथ अस्ट्रेलियाले टस जितेर फिल्डिङ रोजेपछि सुरुवातमा ब्याटिङ गरेको नेपालले निर्धारित २० ओभरमा ९ विकेट गुमाउँदै १ सय ४६ रनको योगफल तयार पारेको थियो ।
नेपालका लागि भीम सार्कीले सर्वाधिक ३२ रन बनाए । यस्तै, दीपेन्द्रसिंह ऐरीले २६, आसिफ शेखले २२, आरिफ शेखले २१ तथा सोमपाल कामीले अविजित १८ रनको योगदान दिए । साउथ अस्ट्रेलियाका थोम्पसन, ब्राउन र मेनेन्टीले समान दुई-दुई विकेट लिए ।
१ सय ४७ रनको लक्ष्य पछ्याउन मैदान उत्रिएको साउथ अस्ट्रेलियाले अन्तिम बलमा सात विकेट गुमाउँदै लक्ष्य पुरा गर्यो । उसका लागि विन्टरले ३६, होगनबोइजिमले २८, कप्तान हार्वेले २७, ड्रियुले २४ र मेनेन्टीले २२ रन बनाए ।
नेपालका सोमपाल कामीले तीन विकेट लिए । नन्दन यादवले दुई तथा कप्तान रोहितकुमार पौडेलले एक विकेट हात पारे ।
बिहीबार नै भएको दोस्रो खेलमा नेपालले टस जितेर घरेलु टोलीलाई ब्याटिङका लागि आमन्त्रण गरेको थियो । साउथ अस्ट्रेलियाले निर्धारित २० ओभरमा ८ विकेट गुमाउँदै १ सय ६० रन तयार पारेको थियो । उसका लागि रियान किंगले ३४ रनको योगदान दिएका थिए । नेपालका लागि करण केसीले ३ तथा सहाव आलमले २ विकेट लिएका थिए ।
जवाफमा १ सय ६१ रनको लक्ष्य पक्ष्याएको नेपााले अन्तिम बलमा सबै विकेट गुमाउँदै १ सय ५७ रन मात्र बनाउन सक्यो । लोकेश बमले ३२ र रुपेश सिंहले ३७ रनको आक्रामक इनिङ्स खेले पनि अन्य ब्याटर चल्न सकेनन् । साउथ अस्ट्रेलियाका लागि क्याम्पवेल थम्पसनले ४ विकेट लिए ।
आईसीसी टी-२० विश्वकपको एसिया तथा इस्ट एसिया प्यासिफिक क्षेत्रको संयुक्त छनोटको तयारीमा रहेको नेपालले शनिबार यसै टोलीविरुद्ध एकदिवसीय अभ्यास खेल खेल्दै अस्ट्रेलिया भ्रमण समाप्त गर्ने छ ।
