काठमाडौं । उखु किसानले काठमाडौं केन्द्रित आन्दोलन स्थगित गरेका छन् । शुक्रबार कृषिमन्त्री रामनाथ अधिकारीसँगको भेटवार्ता पछि केही दिनका लागि आन्दोलन स्थगन गरिएको हो ।
११ जिल्लाका किसानले ६ दिनसम्म आन्दोलन गर्दा पनि राज्यका कुनै निकायले नसुनेको गुनासो किसानका प्रतिनिधिहरूले कृषिमन्त्रीसमक्ष गरेका थिए । प्रधानमन्त्री केपी शर्मा ओली चीन भ्रमणबाट फर्किएपछि आफ्ना माग राख्ने र सम्बोधन नभए फेरि आन्दोलन गर्ने उनीहरूले बताएका छन् ।
किसानसँगको वार्तामा कृषिमन्त्री अधिकारीले किसानलाई उखुमा दिँदै आएको प्रति क्विन्टल ७० रूपैयाँ अनुदान दिलाउन पहल गर्ने आश्वासन दिनुभएको छ । सबै माग सम्बोधनका लागि दशैंसम्म पर्खिनसमेत उहाँले आग्रह गर्नुभएको छ ।
