दार्चुला/ भारतको उत्तराखण्ड राज्यको पिथौरागढबाट ठूलो मात्रामा तस्करीको सामानसहित एक जना नेपाली पक्राउ परेका छन् । करिब एक करोड बढी मूल्य बराबरको भालुको पित्त र चरेससहित एक जना नेपाली नागरिकलाई धारचुलाबाट भारतीय प्रहरीले नियन्त्रणमा लिएको हो ।
उत्तराखण्ड राज्यलाई लागू औषध मुक्त बनाउने उद्देश्यले सञ्चालन गरिएको ‘ड्रग फ्री देवभूमि’ अभियान अन्तर्गत चेकजाँचको क्रममा पिथौरागढ प्रहरीले ठूलो मात्रामा तस्करीको सामानसहित डोल्पाका सुर्यबहादुर बुढाथोकीलाई पक्राउ परेको जनाएको छ ।
धारचुला कोतवाली प्रहरी, एसओजी र वन विभागको संयुक्त टोलीले बिहीवार धारचुलास्थित गलातीबाट धारचुलातर्फ जाँदै गरेका नेपाली नागरिक डोल्पा जिल्लाका सुर्यबहादुर बुढाथोकीलाई चेकजाँच गर्दा २ किलो ३ सय ग्राम चरेस र १ सय ७५ ग्राम भालुको पित्तसहित पक्राउ गरेको भारतीय प्रहरीले जनाएको छ ।
पक्राउ परेका बुढाथोकी माथि एनडीपीएस ऐन ८ र २० अन्तर्गत लागू औषध मुद्दा र वन्यजन्तु संरक्षण ऐन ४०, ४९, ५० र ५१ अनुसार धारचुला कोतवालीमा मुद्दा दर्ता गरी आवश्यक कानूनी प्रक्रिया अघि बढाइएको छ । अभियुक्तलाई न्यायीक हिरासतमा पेश गरिएको भारतीय प्रहरीले जनाएको छ ।
नेपाली व्यक्तिबाट बरामद गरिएको चरेसको अन्तर्राष्ट्रिय बजार मूल्य झण्डै ४ लाख ६० हजार र एक सय ७५ ग्राम भालुको पित्तको मूल्य झण्डै एक करोड भारतीय रुपैयाँ रहेको बताइएको छ ।
