काठमाडौं । नेपालले बंगलादेशविरूद्ध खेल्ने दुई मैत्रीपूर्ण खेलका लागि २३ सदस्यीय अन्तिम टोली घोषणा गरेको छ ।
प्रशिक्षक म्याट रसले दशरथ रंगशालामा हुने दुई खेलका लागि नेपाली टिम घोषणा गरेका हुन् । यसपटक समिर तामाङले टिममा पुनरागमन गरेका छन् । अखिल नेपाल फुटबल संघ-एन्फाले सार्वजनिक गरेको सूचीअनुसार कप्तानको जिम्मेवारीमा गोलकिपर किरण चेम्जोङ कायम रहेका छन् ।
यसअघि नेपाली टिममा कायम रहेका आयुष घलान, सुमित श्रेष्ठ, कृतिसरत्न छुन्जु र अभिषेक स्याङ्तान अन्डर २३ टिममा रहेको कारण सिनियर टिमबाट बंगलादेशसँग खेल्ने छैनन् । नेपाली टिममा यसअघि लाओससँग खेलेका १७ खेलाडीले निरन्तरता पाएका छन् भने ६ फरक खेलाडी छन् ।
यसैगरी प्रशिक्षक रसले ६ जना नयाँ खलाडी टिममा बोलाएका छन् । जसमा आदित्य शाक्य, अमित लामा, दिनेश हेन्जन, रणदीप पौडेल, समिर तामाङ, टिकेन्द्र थापा रहेका छन् । समिरले भने टिममा कमब्याक गरेका हुन् ।
यसअघि टिममा रहेका विमल पाण्डे यसपटक टोलीमा अटाएनन्। साथै टोलीमा अनुभवसहितका खेलाडी रोहित चन्द, अनन्त तामाङ, अन्जन विष्ट, एरिक विष्ट, मनीष डाँगी, सुमन श्रेष्ठलगायत रहेका छन् ।
यस्तै, लकेन लिम्बु, अभिषेक लिम्बु, दीप कार्की जस्ता युवा पुस्ताका खेलाडीले पनि स्थान पाएका छन् । नेपाल र बंगलादेशबीचका खेल यही भदौ २१ र २४ गते काठमाडौंको दशरथ रंगशालामा हुनेछन्। यी खेलहरू मार्फत् नेपालले एसियन कप छनोटका लागि तयारी गर्ने उद्देश्य राखेको छ।
