काठमाडौं । तपाईं आफ्ना दु:ख र अप्ठ्यारा सुनाउन कहीँ जानुभयो । त्यहाँ तपाईंका कुरा सुन्ने भन्दा उल्टै कसैले भाषण सुनाउन थाले तपाईँलाई कस्तो लाग्छ ? तपाईंलाई जस्तो लाग्छ, जिल्ला-जिल्लाबाट काठमाडौं आएका उखु किसानलाई अहिले त्यस्तै भइरहेको छ । उखु किसानको धर्नालाई दलका नेताले रमिता बनाइदिएका छन्। पूर्वप्रधानमन्त्रीदेखि सांसदहरुले उनीहरुको धर्नास्थललाई भाषण ठोक्ने नयाँ ठेगाना बनाइदिएका छन् ।
उखु किसानहरु प्रोत्साहन रकम कटौतीको विरोधमा ५ दिनदेखि काठमाडौंमा धर्नामा छन् । तर उनीहरुको धर्ना नेताहरुलाई भने राजनीति गर्ने अवसर बनेको छ । बिहीबार पनि पालैपालो नेताहरु आउने, भाषण गर्ने र तस्बिर खिचाउने क्रम जारी रह्यो । मध्याह्न १२ देखि १ बजेको बीचमा राष्ट्रिय स्वतन्त्र पार्टीकी सांसद चन्दा कार्की, जनता समाजबादी पार्टी नेपालका अध्यक्ष उपेन्द्र यादव, नेता हृदयेश त्रिपाठीलगायतका नेता आएर ऐक्यबद्धता जनाए ।
उखु किसानको आन्दोलनमा पूर्वप्रधानमन्त्रीहरु माधवकुमार नेपाल तथा बाबुराम भट्राई, पूर्वउपप्रधानमन्त्री नारायणकाजी श्रेष्ठसहित एकदर्जनभन्दा बढी सत्ता तथा विपक्षका सांसदहरु पुगिसकेका छन् । नेताहरु आउने, भाषण सुनाउने तर आफ्ना माग पूरा गर्न पहलै नगर्ने प्रवृत्तिले किसान आजित भएका छन् ।
सरकारले उखु खेती प्रवर्द्धनका लागि १६ वर्षदेखि दिादै आएको अनुदान प्रतिक्विन्टल ७० रुपैयााबाट घटाएर ३५ रुपैयाा बनाएपछि किसानहरु आन्दोलित भएका हुन् । कहिले उखुको भुक्तानी नपाएको त कहिले अनुदान नपाएको भन्दै किसानहरु बर्सेनि सडकमा आउन बाध्य भइरहेका छन् । यसपटक पनि उनीहरु पुनः काठमाडौंकेन्द्रित आन्दोलनमा छन् । र, उनीहरुको धर्नामा फोटो खिचाउने र भाषण गर्ने नेताहरुको लर्को लागिरहेकै छ ।
