काठमाडौं । अखिल नेपाल फुटबल संघको आयोजना आगामी साउन २९ देखि एन्फा महिला लिग क्वालिफायर सुरू हुने भएको छ ।
सातदोबाटोस्थित एन्फा कम्प्लेक्समा बुधबार एन्फाले पत्रकार सम्मेलन आयोजना गर्दै क्वालिफायरको तयारी पूरा भएको जनाएको हो । लिगका खेलहरू एन्फा कम्प्लेक्स मैदानमा र च्यासलस्थित च्यासल मैदानमा हुने भएका छन् ।
एन्फा महिला लिग क्वालिफायरमा न्युरोड टिम, स्टुडेन्ट फुटबल क्लब, सिन्धुपाल्चोक एफसी, आरएस रिसोर्ट एण्ड बिच फुटबल क्लब, राप्ती फुटबल क्लब, एनबिएम पोखरा एफसी, नेपाल खेलकुद क्लब, लम्की फुटबल एण्ड ट्रेनिङ सेन्टर, झापा एफसी, एफसी राइले, चर्च ब्वाइज युनाइटेड, छाहारी युवा क्लव, बुटवल लुम्बिनी एफसी र संकटा क्लब गरी कुल १४ क्लबले छनोट खेल्नेछन् ।
यो प्रतियोगिताबाट कुल पाँच टोली महिला लिगका लागि छनोट हुनेछन् । कुल १४ वटा टोलीलाई दुई समूहमा विभाजन गरिएको छ । हरेक समूहमा ६ खेल हुनेछन् । दुवै समूहको विजेता र उपविजेता स्वत छनोट हुने प्रावधान छ । समूहका तेस्रो स्थानमा रहने टोलीबीच नकआउट प्रतिस्पर्धा हुने र विजेता छनोट हुनेछ ।
