काठमाडौं । नेपाल स्कुल खेलकुद महासंघ र निजी तथा आवासीय विद्यालय संगठन नेपालबीच समझदारीपत्रमा हस्ताक्षर भएको छ ।
बिहीबार काठमाडौंमा एक कार्यक्रमबीच महासंघ र प्याब्सनबीच सम्झौतापत्रमा हस्ताक्षर भएको हो । सम्झौतापत्रमा महासंघका अध्यक्ष विनोद श्रेष्ठ, प्याब्सनका अध्यक्ष कृष्णप्रसाद अधिकारी र अन्तर्राष्ट्रिय स्कुल खेल महासंघका प्रतिनिधि राजकुमार कार्कीले हस्ताक्षर गर्नुभयो ।
समझदारीसँगै निजी तथा आवासीय विद्यालयहरुमा खेलकुद कार्यक्रमको विकास, प्रवर्द्धन र समन्वयका लागि संयुक्त कार्य संरचना स्थापना गर्ने उद्देश्य लिइएको छ । विद्यार्थीमा शारीरिक स्वास्थ्य, सामुहिक भावना, अनुशासन र समग्र व्यक्तित्व विकासको लागि खेलकुदको महत्व महत्वपूर्ण रहेको प्याब्सनका अध्यक्ष कृष्णप्रसाद अधिकारीले बताउनु भयो ।
सम्झौताअन्तर्गत पूर्वाधार विकास, प्रतियोगिता आयोजना, प्रतिभा पहिचान तथा शारीरिक शिक्षाको प्रवर्द्धनमा सहकार्य गरिने उहाँले बताउनु भयो । निजी तथा आवासीय विद्यालयहरूमा विद्यार्थीको खेलकुद तथा शारीरिक गतिविधिमा सक्रिय सहभागिता बढाउने, जिल्ला, प्रदेश तथा राष्ट्रिय स्तरमा एनएसएसएफ प्याब्सन कप, आइएसएफ प्याब्सन कप, आइएसएफ प्याब्सन कमब्याट गेम्स, आइएसएफ प्याब्सन गेम्स र स्कुल प्राइमर लिगलगायतका प्रतियोगिताहरू संयुक्त रूपमा आयोजना गरिने उहाँले बताउनु भयो ।
निजी तथा आवासीय विद्यालयहरूमा खेलकुद उपकरण र संरचना सुधारमा सहयोग गर्ने, युवा खेलाडीलाई पहिचान गरी उनीहरूलाई विशेष तालिम र प्रतिष्पर्धामार्फत विकास गर्न आवश्यक अवसरहरू प्रदान गर्ने उद्देश्य राखिएको छ । सम्बन्धित पक्षहरूले खेलकुद कार्यक्रमहरूको लागि आवश्यक आर्थिक तथा भौतिक श्रोतहरूको परिचालनमा सहकार्य गर्नेछन् ।
सरकारी निकाय, निजी क्षेत्र तथा अन्तर्राष्ट्रिय निकायहरूसँग सहकार्य गरी श्रोत जुटाउने काम गरिने उहाँको भनाइ छ । कार्यक्रमहरूको प्रभावकारिता सुनिश्चित गर्न नियमित रूपमा संयुक्त अनुगमन तथा मूल्यांकन प्रणाली लागू गर्ने पनि जानकारी उहाँले दिनुभयो ।
आवश्यक सुधार र रणनीतिहरूको पुनरावलोकन समय समयमा गरिने विषयमा उहाँले जानकारी दिनुभयो । सम्झौता आजैबाट प्रारम्भ हुने र तीन वर्षको लागि मान्य हुने बताइएको छ । पक्षहरूको पारस्परिक सहमतिमा यसको अवधि नविकरण गर्न सकिने र कुनैपनि पक्षले सम्झौता समाप्त गर्न चाहे कम्तीमा ३० दिन अगाडि लिखित सूचना दिनुपर्नेछ ।
