काठमाडौं । साउदी प्रो लिगको रियाद डर्बीमा अल नासार विजयी भएको छ । नासारले अल हिलाल माथि ३-१ गोलको जित हात पारेको हो ।
किङडम अरिनामा गएराति भएको खेलमा हिलालले सुरुवाती पाँच मिनेटमा नै नासारका गोलकिपर बेन्टोलाई चुनौती दिएको थियो । तर अग्रता भने नासारले लियो । पहिलो हाफको इन्जुरी समयमा अलि अल हसनले आकर्षक गोल गर्दै डेडलक तोडे ।
दोस्रो हाफको सुरुवातमै नासारले अग्रता दोब्बर बनायो । ४७औं मिनेटमा कप्तान क्रिस्टियानो रोनाल्डोले साडियो मानेको क्रसलाई गोलमा परिणत गरे । ६२औं मिनेटमा हिलालका अलबलाहीले हेडर गोल गर्दै नासारसँगको दूरी कम गरे ।
तर ८८औं मिनेटमा नासारले पेनाल्टीको अवसर पायो । रोनाल्डोले पेनाल्टीमा गोल गरेपछि नासारले हिलालमाथि ३-१ को महत्वपूर्ण जीत हात पारेको हो । नासार अंक तालिकाको तेस्रो स्थानमा छ ।
उसको २६ खेलबाट ५४ अंक छ । जुन शीर्ष स्थानको अल इत्तिहादभन्दा सात अंकले पछि हो । दोस्रो स्थानको हिलालको ५७ अंक छ। इत्तिहादले यी दुई टिमभन्दा एक खेल कम खेलेको छ ।
