काठमाडौं । इन्डियन प्रिमियर लिग-आईपीएलमा लखनऊ सुपर जायन्ट्सले मुम्बई इन्डियन्समाथि १२ रनको जित हात पारेको छ । घरेलु मैदानमा लखनऊलाई जित दिलाउने क्रममा मिचेल मार्शले आक्रमक अर्धशक प्रहार गर्दा शार्दुल ठाकुर, आभेस खान र दिग्बेश राठीले उत्कृष्ट बलिङ गरे ।
एकाना स्टेडियममा मुम्बईले टस जितेर पहिले फिल्डिङ रोज्यो । लखनऊले २० ओभरमा आठ विकेट गुमाएर २ सय ३ रनको योगफल बनाएको थियो । मार्श र एइडेन माक्रमले ७६ रनको ओपनिङ साझेदारी गदै लखनऊलाई राम्रो सुरुवात दिलाए ।
मार्शले ३१ बलमा नौ चौका र दुई छक्का प्रहार गर्दै ६० रनको योगदान गरे । उनी विघ्नेश पुथुरको बलमा आउट भएका थिए । यो सिजन अस्ट्रेलियन मार्शको आइपीएलमा यो तेस्रो अर्धशतक हो ।
त्यसपछि लखनऊले लगातार विकेट गुमायो । उच्च फर्ममा रहेका निकलस पुरन १२ र कप्तान रिसव पन्त २ रनमा हार्दिक पान्डयाको बलमा आउट भए । रिसव लगातार चौथो खेलमा रन बनाउन असफल भए ।
आयुस बडोनीले ३० रन जोडे । माक्रमले ५३ रनको महत्वपूर्ण इनिङस खेले । डेविड मिल्लरले २७ रन जोडे । कप्तान हार्दिकले चार ओभरमा ३६ रन खर्चिएर ५ विकेट लिए ।
उनी आइपीएलको एकै इनिङसमा पाँच विकेट लिने पहिलो कप्तान हुन् । साथै टी ट्वान्टीमा हार्दिकले पाँच विकेट लिएको पनि यो पहिलो पटक हो । जवाफमा मुम्बईले पाँच विकेटको क्षतिमा १ सय ९१ रन मात्र बनाउन सक्यो ।
ओपनर विल ज्याक र रायन रिकल्टन १० रनमा नै पभेलियन फर्किए । नमन धिर र सूर्यकुमार यादवले इनिङस सम्हाल्ने प्रयास गरेका थिए । तर दिग्बेशले नमनलाई ४६ रनमा बोल्ड गर्दै लखनऊलाई खेलमा फर्काए । लखनऊको यो दोस्रो जित हो ।
उसको चार खेलबाट चार अंक भएको छ । मुम्बइको समान खेलबाट दुई अंक छ । चोटका कारण मुम्बईका रोहित शर्माले यो खेल गुमाएका थिए । आइपीएलमा आज दुई खेल हुनेछन् । दिउँसो पौने तीन बजे चेन्नइ सुपर किंस र दिल्ली क्यापिटल्स तथा साँझ पौने ८ बजे पंजाव किंस र राजस्थान रोयल्स बीच प्रतिस्पर्धा हुनेछ ।
