काठमाडौं । नेपाल सुपर लिगमा एफसी चितवनले लगातार दोस्रो जित हासिल गरेको छ। दशरथ रंगशालामा हिजो भएको खेलमा बुटबल लुम्बिनी एफसीलाई १-० ले हराउँदै चितवन अंक तालिकाको शीर्षस्थानमा उक्लिएको हो।
बुटबल लुम्बिनीले भने तेस्रो खेलसम्म पनि जित हाासिल गर्न सकेको छैन्। चितवनका लागि १३औं मिनेटमा शिशिर लेखकीको क्रसमा अन्जन विष्टले फितलो प्रहार गर्न पुगे। १६औं मिनेटमा टोरिक जेब्रिनको कर्नरमा अभिषेकको हेडर पनि पोस्टको दिशामा रहन सकेन।
लगातार आक्रमणको प्रयास गरेको चितवनका नोदिर माभ्लानोभको लङ रेन्जर पनि पोस्टभन्दा माथिबाट बाहिर गयो। ३९औं मिनेटमा पाएको फ्रि-किक नोदिरले नै प्रहार गरेको भएपनि यसपटक उनको प्रहारमा बल गोलकिपर दीप कार्कीले सहजै बचाए।
४१औं मिनेटमा कप्तान एरिक विष्टको फ्रि-किक बारमा लागेर फर्किएको थियो। एरिकले निकै सुन्दर र चलाखीपूर्ण प्रहार गरेको भएपनि उनी गोलमा असफल भए। पहिलो हाफको इन्ज्युरी समयमा गोलकिपर दीपले राम्रो बचाउ गर्दा चितवनको अट्याक प्रयास असफल भएको थियो।
दोस्रो हाफको दुई मिनेटमै मानरेसेले गोलकिपर दीपबाट बल खोजेर प्रहार गर्न ढिलो गर्दा उनी गोलको नजिकै पुगेर पनि स्कोरमा असफल भए। खेलको इन्ज्युरी समयमा चितवनले डेडलक तोड्यो।
टोरिक जेब्रिनले टिममेटलाई मिलाएको पास रिबाउन्ड भएपछि दोस्रो बारतर्फ गरेको प्रहार सिधै गोल भएको थियो। यससँगै चितवनले लगातार दोस्रो जित हाासिल गरेको हो। यो जितसँगै उसले २ खेलबाट ६ अंक बनाएको छ।
