जर्मनीका डिफेन्डर म्याट्स हमल्सले व्यावसायिक खेल जीवनबाट सन्यास लिने

चैत्र २३, २०८१ |खेल ब्युरो
जर्मनीका डिफेन्डर म्याट्स हमल्सले व्यावसायिक खेल जीवनबाट सन्यास लिने

काठमाडौं । विश्वकप विजेता जर्मनीका डिफेन्डर म्याट्स हमल्सले सिजनको अन्त्यसँगै व्यावसायिक खेल जीवनबाट सन्यास लिने भएका छन् ।

सन २०१४ को फिफा विश्वकप च्याम्पियन हमल्सले दुई दशक लामो फुटबल करियरलाई विश्राम दिने निर्णय सुनाएका हुन् । ३६ वर्षीय हमल्सको इटालियन सिरी आ क्लब रोमासँगको सम्झौता आगामी जुनमा सकिनेछ । 

गत वर्ष रोमामा आवद्ध भएका उनले क्लबका लागि १८ खेल खेले । बायर्न म्युनिख एकेडेमीका उत्पादन हमल्सले २००७ मा १८ वर्षको उमेरमा डेब्यु गरेका थिए । २००८ मा हमल्स बायर्नको चीर प्रतिद्वन्द्वी बोरुसिया डर्टमन्टमा आवद्ध भए । 

सुरुवातमा लोनमा गएका उनीपछि डर्टमन्डको मुख्य खेलाडी बनेका थिए । योर्गन क्लोपको नेतृत्वमा डर्टमन्टले दुई पटक बुन्डेसलिगा जित्दा हमल्सको प्रदर्शन महत्वपूर्ण रह्यो । उनी फेरी २०१६ मा बायर्न फर्किए । 

त्यहाँ तीन पटक जर्मन लिग उपाधि जितेका हमल्स तीन वर्षपछि पुन: डर्टमन्ड गए । सेन्टर ब्याक हमल्सले दुई पटक च्याम्पियन्स लिग फाइनल खेले । तर २०१३ र २०२४ दुवै पटक उनको टिम उपविजेतामा सिमित भयो । 

उनले डर्टमन्डका लागि ५ सय ८ र बायर्नका लागि १ सय १८ खेल खेलेका छन् । राष्ट्रिय टिमबाट ७८ क्याब जितेका हमल्सले २०१० देखि २०२३ को अवधिमा पाँच गोल पनि गरेका छन् ।