काठमाडौं । पहिलो संस्करणको नेपाल कबड्डी लिगको उपाधि जनकपुर नाइट्सले जितेको छ । दशरथ रंगशालाको कभर्डहलमा आज भएको खेलमा काठमाडौं माभरिक्सलाई हराउँदै जनकपुरले उपाधिसहित पाँच लाख पुरस्कार जितेको हो ।
प्रतिस्पर्धात्मक खेलको पहिलो हाफमा जनकपुरले २४-१९ को अग्रता बनाएको थियो। पाँचौं मिनेटमा नै जनपुकरका चायाफुन कामुनीले सुपर रेडमा पाँच अंक बटुलेका थिए। यसँगै काठमाडौंलाई अलआउट गराएर जनकपुरले ९-२ को फराकिलो अग्रता बनाएको थियो ।
ट्याकलमासमेत राम्रो प्रदर्शन गरेको जनकपुरले लगतार अग्रता बनायो। प्रतियोगितामा सर्वाधिक अंक बटुलेका घनश्याम रोका मगरका धेरै रणनीति फेल भएपछि पहिलो हाफमा काठमाडौं पछि परेको हो । मेघराज गिरीले सुपर रेड र १६ औं मिनेटमा काठमाडौंको सुपर ट्याकल रोमाञ्चक बनेका थियो ।
दोस्रो हाफमा खेल थप रोमाञ्चक बनेको थियो। जहाँ काठमाडौंले लगातार अंक जोडेर ३१-३१ को बराबरी गरेको थियो। अन्तिम रेडमा आएका मेघराज गिरीलाई सुपर ट्याकल गरेपछि जनपुरले उपाधि जितेको हो। यो सुपर ट्याकलसँगै प्रशिक्षक पार्वती राइको टोलीले ४५-४१ ले उपाधि जितेको हो । फाइनलमा पराजित भएको काठमाडौंले दुई लाखमा चित्त बुझाएको छ ।
